Bak matbloggen enklypesalt.no står nemleg Sigrunn Eliassen, som til vanleg er forskar i teoretisk økologi. For tida held ho seg i Perth i Australia, der ho har eit prosjekt med fokus på makeval, paringsstrategiar og evolusjon av samarbeid.
Ville organisere eigne oppskrifter
Eliassen har alltid vore glad i, og hatt ei interesse for, matlaging. Alt frå smak til teknikk og ikkje minst den sosiale delen av det har vore viktig for ho. Ho starta bloggen sin for å samle og organisere eigne oppskrifter som ho kunne dele med andre. Så har det balla på seg.
– Det har etter kvart blitt eit meir sjølvmotiverande prosjekt. Gjennom bloggen har eg blitt meir observant på den visuelle sida av matopplevinga, og eg forsøker å lære meg korleis ein kan formidle det gjennom bilete slik at folk vert inspirerte og svoltne, fortel Eliassen.
Bloggen ber preg av nøysamt og tidkrevjande arbeid med lekre rettar som er pent danderte, og vakre bilete. Men om du trudde dette var mat som berre er meint for å sjå vakker ut på ei nettside så tek du feil.
– Eg lagar ikkje mat spesielt for bloggen. Dette er mat som vi et heime hos oss, men eg brukar nok over gjennomsnittleg mykje tid på å tenkje på og på å lage til mat. Når det gjeld dei delane som er knytt direkte til bloggen, så ser eg på det som mi avkopling i kvardagen. Nokre ser på tv, eg hentar inspirasjon av å jobbe med foto og matidear, seier Eliassen.
Hadde aldri trudd ho skulle bli finalist
Etter at det vart kjent at enklypesalt.no var ein av fem finalistar til å bli årets matbloggar har den matglade forskaren fått mykje positiv respons.
– Eg har ikkje gjort så mykje for å gjere bloggen min kjend og mange av dei eg jobbar med var ikkje eingong klar over at eg blogga om mat.
Overraskinga var difor også stor då ho fekk vite at ho var ein av finalistane.
– Eg var klar over at eg var nominert, men at eg skulle bli ein av fem finalistar blant nær 2000 andre bloggarar var veldig overraskande.
Overraskande var det kanskje også at merksemda som kom etter finaleplassen har vore så stor.
– Same veke som det vart offentleggjort at eg var finalist til årets matbloggar vart forskinga vår portrettert i ein News and Views artikkel i Nature, under tittelen Love thy neighbour. Teorien vår går ut på at sideparing, eller utruskap om du vil, hjå fugl, dannar grunnlaget for samarbeid mellom naboar og er viktig del for å forstå sosialitet også hjå andre artar. Ein skulle kanskje tru at dette ville vekkje litt oppsikt, men fokuset rundt matbloggen har vore heilt enormt til samanlikning.
Parallellar mellom forsking og matlaging
Då er det kanskje bra at ein kan finne spor av akademia i bloggen til Eliassen. I juryens vurdering av bloggen til Eliassen står det mellom anna:
<< Enklypesalt.no er en moderne matblogg som syder av overskudd og matglede. Svært høy kvalitet på bilder og gjennomgående god pedagogisk formidling av oppskrifter.>>
Kanskje har den akademiske bakgrunnen til Eliassen gjort nytte for seg også i matverda?
– Det å uttrykke seg klart og konsist er viktig både når ein skriv vitskaplege artiklar og oppskrifter, så det kan kanskje vere ein overføringsverdi her. Det er også fleire parallellar mellom jobben min som forskar og matinteressa. Det handlar om å dykke ned i eit tema, finne ut av ting og utforske moglegheitene. Kreativitet og eit ynskje om å lære nye ting er viktig i begge tilfella.
(Artikkelen held fram under videoen)
Her kan du sjå intervjuet VGTV har laga med Sigrunn Eliassen i forbindelse med finaleplassen i årets matbloggar.
Bryggar øl med kollegaer
Ser ein godt etter i oppskriftene kan ein finne spor av biologi for eksempel i denne oppskrifta på fikensalat, men matlaging handlar også mykje om kjemiske prosessar.
– Ta for eksempel varmebehandling. Ei forståing for dette er viktig for å få fram dei rette smakane. Trykkoking mogleggjer prosessar som vanlegvis ikkje skjer ved vanleg koking, og med sous vide kan ein regulere temperaturen nøyaktig, same kva råvarer ein nyttar.
Ein annan kjemisk prosess Eliassen interesserer seg for er ølbrygging.
– Saman med fire andre kollegaer bryggar eg øl i eit heimebryggeri. Også der er temperaturkontroll utruleg viktig for å mellom anna vere sikker på å få rett sødme.
Ikkje opplevd <<matpress>> frå kollegaer
Sjølv om bloggen til Sigrunn Eliassen fløymer over av vakre bilete med god mat har ho ikkje merka noko forventningspress frå sine kollegaer når det kjem til lunsjen på jobb.
– Vi har felles smørelunsj i forskingsgruppa og eg har ikkje merka noko forventningspress i så måte. Det einaste måtte då vere at det er sjølvsagt at eg bidreg med ferskt, heimebaka brød.
(Artikkelen held fram under biletet)
Ein skal ikkje sjå vekk ifrå at mange av dei som jobbar med Sigrunn Eliassen gjerne skulle hatt desse rundstykka med valmuefrø til lunsj. Foto: Sigrunn Eliassen
Trur ikkje ho kjem til å vinne
Det vankar fine premiar på den som stikk av med sigeren i årets matbloggar den 12. oktober på Mathallen i Oslo, men Eliassen sjølv trur ikkje ho har store sjansar til å vinne.
– Eg ser på meg sjølv som ein outsider i denne samanhengen og er nøgd med å ha kome heilt til finalen. Fleire av dei andre i finalen er matbloggarar på heiltid med mange følgjarar dei kan hente stemmer frå.
Eliassen tek likevel med seg finaleplassen i årets matbloggar vidare, samt at ho også er finalist i årets fotoblogg, også den innanfor matkategorien.
– Denne merksemda gjer det sjølvsagt inspirerande å jobbe vidare og utvikle bloggen, men det er jo eit hobbyprosjekt, avsluttar Eliassen.
Vil du stemme på din favoritt til årets matbloggar kan du gjere det her.
