Mørk er overlege i patologi ved Avdeling for patologi, Haukeland Universitetssjukehus og professor II i patolog ved Gades institutt, Universitetet i Bergen. Sidan 1993 har han vore koordinator for samarbeidet mellom dei to universiteta. Samarbeidet kom i stand i 1976, og har fokusert på medisinarutdanning, forsking og studentutveksling.
Overraska og rørt
Den offisielle utnemninga av Mørk fann stad ved Universitetet i Lübeck si årlege mottaking den 27. mars, med 250 gjester til stades, mellom dei universitetspresident Prof. Dr. Peter Dominiak og vitskapsminister for Schleswig-Holstein, Dr. Werner Manette.
Mørk vart alt i fjor informert om at han vart tildelt æresdoktortittelen.
– Det var overraskande og rørande, seier han til På Høyden.
– God kjemi
I takketalen sin omtalte Mørk den gode kjemien mellom dei to universiteta og deira representantar. Rettsmedisinarane Otto Pribilla og Johan Christoffer Giertsen kom gjennom ei felles fagleg, vitskapleg og personleg forståing på tanken om eit samarbeid i starten på 70-åra. Samarbeidet vart offisielt i 1976, med fakultetsdirektør Johannes Teigland som koordinator frå UiB si side. I 1993 tok Mørk og professor Jan Fredrik Halvorsen over som koordinatorar.
Mørk er ikkje berre rørt over æra han er tildelt frå Universitetet i Lübeck, men er full av lovord om samarbeidet mellom dei to universiteta.
– Som eg sa i talen har det alltid vore ein framifrå kjemi mellom oss. UiB har hatt stipendiatar i Lübeck, det har vore gode gjesteførelesningar. Noko av det mest vellukka har nok vore sjølve studentutvekslinga.
– Akademisk teamarbeid
I si tale takka han særleg Johannes Teigland, Torill Knag og Jan Fredrik Halvorsen for godt samarbeid. Halvorsen døde i 2003, og er djupt sakna, sa Mørk.
– Me har alltid vore eit godt team, utnemninga ser eg på som ein honnør til hele teamet, seier han til På Høyden, .
Samarbeidsprosjektet mellom universiteta i Lübeck og Bergen har vore ein suksess, meiner Mørk. I alt 700 studentar har vore på fellesseminar i både Bergen og Lübeck, og 180 medisinstudentar har vore på utveksling. I tillegg kjem alle gjesteførelesingane og vitjingar frå professorar.
– Det vert spanande å sjå korleis samarbeidet vil utvikla seg framover. No ser me fram til å helsa knappe 30 studentar og lærarar velkomne til ei ny Lübeck-veke i slutten av mai. seier den nybakte æresprofessoren.
