Gita Frimannslund Storegjerde arrangerer demonstrasjon til støtte for museet og dyra, som no er i eksil. Ho vil heller ha museum enn mausoleum. Demonstrasjonen er i ettermiddag klokka 16.
Demonstrerar for museet
Gita Frimannslund Storegjerde vart så skuffa over manglande løyving til Universitetsmuseet at ho i dag arrangerer demonstrasjon og konsert til støtte for prosjektet.
Markeringa startar klokka 16 i dag ved den blå steinen, før ein går i tog opp til Muséplass for appellar og påfølgande konsert.
– No må vi gjere noko! Vi hardingar er ikkje så lette å stogge, seier den engasjerte studententen i museologi, som òg jobbar på museet.
– Men dette gjer eg som privatperson og student, understrekar ho.
Studentparlamentet deltek òg, og på Museplass skal representantar frå UiB-institutt, skular og museumsmiljøet i Bergen halde appellar. Mangeårig direktør for Gamle Bergen, Trygve Fett, og Sigurd Sandmo frå Kode er blant dei.
Under parolar som <<Vi vil ha museum, ikkje mausoleum>> går toget frå Ole Bulls plass gjennom Christies gate og til Muséplass. Og etter appellane startar musikken:
– Dette blir eit <<band aid>> for museet.
Ideen om demonstrasjon har kverna hos Storegjerde heilt sidan ho fekk høyre om den manglande løyvinga i revidert nasjonalbudsjett i førre veke.
– Museet er ikkje berre eit naturhistorisk museum. Det har kulturhistorisk verdi òg. Museet er særs viktig som inspirasjon for elevar og andre, og som ein del av den livslange læringa.
