Eit nytt og heilskapleg opplegg for trykking av doktoravhandlingar skal sikre at prosessen blir enklare og resultatet meir profesjonelt enn før, opplyser Forskingsavdelinga.
Tidlegare er trykking av doktoravhandlingar blitt handtert på ulikt vis av dei ulike fakulteta. No er det utforma eit standard omslag og tekstmalar som skal brukast på alle avhandlingane, og det er inngått ein avtale med Allkopi som skal sikre god tilrettelegging og god pris på trykkinga. I tillegg er prosessen tilrettelagt for print-on-demand, i fall kandidatane treng opptrykk av avhandlinga på eit seinare tidspunkt. Forskingsavdelinga har nyleg orientert om den nye prosessen i eit brev til fakulteta.
Kopisenteret kan ta imot avhandlingar både på papir og digitalt, men di meir som kan leverast digitalt, di billegare blir det. For å redusere tilpassingsarbeidet er det utvikla enkle tekstmalar som kandidaten kan bruke under skrivinga. I tillegg er det laga ein mal på engelsk for samandrag – såkalla abstracts. Dei kan trykkast inne i sjølve avhandlinga og i tillegg som ein handout til dei som ikkje treng å ha heile avhandlinga tilgjengeleg. Det er oppretta ein eigen ISBN-serie for avhandlingar, som blir forvalta av kopisenteret på vegner av UiB.
Datafila som blir brukt til print, skal også kunne publiserast elektronisk i Bergen Open Research Archive (BORA) etter at kandidaten har inngått avtale om dette med Universitetsbiblioteket. UiB oppmodar no alle kandidatane om å publisere avhandlingane elektronisk, spesielt ettersom bytteordninga for avhandlingar no er lagt ned.