Førsteamanuensis Elisabeth Ivarsflaten er “mor” til det første internettpanelet for forskingsformål i landet. No blir Medborgarpanelet utvida. Foto: Paul Sigve Amundsen
Utvidar laboratorium med Mohn-pengar
Det kan gi svar på sentrale samfunnsspørsmål, og kartleggje endringar i haldningar over tid. Medborgarpanelet har fått 20 friske millionar kroner av Bergens forskningsstiftelse (BFS), og vert brukt både nasjonalt og internasjonalt av forskarar innan mange disiplinar.
– Det blir eit kjempeløft for samfunnsvitskapen og for tverrfaglig forsking i Noreg, seier Elisabeth Ivarsflaten, førsteamanuensis ved Institutt for samanliknande politikk, til Universitetet i Bergen sine nettsider.
Norsk medborgerpanel blei operativt i 2013, då oppunder 5000 respondentar deltok i den første datainnsamlinga.
Med dei 20 ekstra millionane blir panelet etablert som eit forskingskonsortium, der fleire institusjonar kan delta, under namnet Kjernefasilitet for digital samfunnsvitenskap ved UiB (Digital Social Science Core Facility), DIGSSCORE. Forskingsgruppa The Choice Lab ved Norges handelshøyskole og Uni Research Rokkansenteret er og partnerar i prosjektet, som har eit budsjett på 53,8 millionar kronar.
Pengane frå BFS gjer det muleg å gjennomføre undersøkingar tre gonger i året, i staden for to.
Den nye kjernefasiliteten for forsking innan humaniora, samfunnsfag, psykologi og juss har vakse fram som ein respons på den digitale revolusjonen som har skjedd i det norske samfunnet dei siste åra.
– Det endrar samfunnet vårt. For samfunnsvitskapane inneber dette store muligheiter, heilt andre enn for berre ti år sidan. No kan vi få svar på spørsmål vi ikkje tidlegare trudde det var mogeleg å få svar på, til dømes om ytterleggåande meiningar i det norske samfunnet, seier Ivarsflaten til uib.no.
Medborgarpanelet opnar for ei langt meir effektiv datainnhenting enn tidlegare. Forsking som før kunne ta fleire år, kan no gjerast på få dagar. Målet er å drive nyskapande og verdsleiande forsking på samfunn og politikk.
Norsk medborgerpanel
- Ei internettbasert undersøking om nordmenn sine haldningar om viktige samfunnstema.
- Panelet vert drive av samfunnsforskarar ved Universitetet i Bergen, Uni Research Rokkansenteret og Institutt for samfunnsforskning og vert utelukkande nytta til forskingsformål.
- Deltakarane representerer eit tverrsnitt av det norske folket, som nokon få gonger i året vert inviterte til å seia si meining i viktige spørsmål om norsk samfunn og politikk.
