I løpet av dei neste åra går ti av dei femti tilsette ved Institutt for biologi over i pensjonistane sine rekkjer. Berre halvparten av dei vil verta erstatta.
Det fortalte instituttleiar og professor Anders Goksøyr i utdanningsutvalet denne veka. Pengane vil i staden verta brukt til å halda fram det arbeidet som allereie er i gang ved instituttet.
– Me har no eitt felles bachelorprogram for biologi, og me treffer studentane allereie i første semester, sa Goksøyr.
Biologi frå dag ein
Goksøyr var i utdanningsutvalet for å fortelja om røynslene med å flytta ex phil.
– Me ønskjer å treffa studentane allereie i første semester. Det gjer me no, no er det obligatorisk å ta emna innføring i økologi og evolusjon då. I tillegg kjem innføringskurs i matematikk og kjemi. I andre semester kjem ex phil, i ein variant som er tilpassa biologi, fortalte Goksøyr.
I studieplanen heiter det at det er ex phil-varianten for biologi som er tilrådd, men at andre variantar av ex phil òg vert godtatt.
Biologisk institutt vart danna ved at Botanisk institutt, Institutt for fiskeri- og marinbiologi, Institutt for mikrobiologi, Zoologisk institutt og Senter for miljø- og ressursstudier vart slått saman.
– Me ønskjer å ha meir undervisning i lab og felt. No jobbar faga saman. Det vert meir samarbeid og meir sosialt, men samstundes meir logistikk med store grupper, sa Goksøyr.
Han sa at han syntest faget var i ferd med å verta for teoritungt. Difor er det gjort fleire endringar. Instituttet har eit budsjett på 100 millionar kroner og femti tilsette.
Ut i felt i første semester
Allereie i første semester får studentane no koma ut i felt. Rett nok ikkje så langt, dei reiser til dømes til Akvariet. Men Goksøyr meiner det er viktig at dei allereie då får kjenna litt på faget. Å få biologifag tidleg, meiner han òg kan gjera at talet på dei som sluttar vert mindre.
Instituttet tilbyr i dag tre bachelorgrader; i biologi, i havbruksbiologi og i miljø- og ressursfag. Neste prosjekt er å straumlinjeforma masterprogramma i større grad.
– Dei reviderer me no. Me har mellom anna redusert den totale emneporteføljen vår, frå 90 til 70, fortalte instituttleiaren.
Biologistudentane får prøva seg i felt allereie det første semesteret. Ex phil er flytta til andre. Biletet er frå den marinbiologiske stasjonen ved Espeland. Arkivfoto: Paul Sigve Amundsen