Den eldste delen av Cambridge blei grunnlagt i 1284. Foto: Colourbox
Snart kan det bli slutt på offentlege eksamensresultat
Gamal Cambridge-tradisjon står for fall.
Når ein sensur fell ved det prestisjetunge universitetet Cambridge, vert resultata publiserte. Lister med namn på studentane vert offentleggjort, saman med kva karakter dei har fått.
Offentleggjeringa av eksamensresultat ein gamal praksis ved universitetet.
Omsyn til psykisk helse
Dei studenttilitsvalde har i fleire år argumentert med at karakterlistene har sterke negative følgjer for studentane, og er ekstra mentalt belastande for studentar som får dårlege karakterar. Dette skriv Telegraph.
Gjennom aksjonar og kampanjar har studentorganisasjonar arbeidd for å få Cambridge-leiinga til å lytte.
Studentunionen ved Cambridge vedtok i november i fjor ein resolusjon som seier at det noverande systemet frårøvar studentane høvet til å halde resultata hemmeleg, og er skadeleg for velferda til mange studentar.
Følgjer etter Oxford
No vil General Board of the Faculties, organet som er ansvarleg for universitetet sin forskings-og utdanningspolitikk, endre dette.
Saka skal bli behandla av det øvste styret, men innstillinga peikar mot at den gamle tradisjonen vil bli avvikla.
Universitetet i Oxford hadde også tidlegare offentlege eksamensresultat, men slutta med dette i 2009.
Dette er også Cambridge:
- Universitetet har omlag 18 000 studentar, og si eiga politistyrke med tretti konstablar.
- Styret ved universitetet har vore svært innflytelsesrik, og skal også ha bestemt at jernbanelinja skulle gå eit stykke utanfor Cambridge, slik at ikkje studentane vart freista til å reise til London.
- De tre semestera er kalla Michelmas, Lent og Easter.
- Studentane må bu på universitetet gjennom semesteret.
- Universitetet i Oxford har produsert flest statsministerar, mens universitetet i Cambridge kan briske seg med flest nobelprisvinnarar blant sine alumni.
- Natt-klatring på dei gamle fasadane har blitt gjort i ei årrekke. I 2009 hengte klatrande studentar tjuefem julenisseluer på ulike bygningar, deriblant på spiret tilKing’s College Chapel.
- Universitetet har over 29 millionar bøker. Av kvar tittel som årleg vert gjeven ut i Storbritannia, vert eitt eksemplar sendt til Cambridge.
- Charles Darwin, Sir Isaac Newton, Stephen Hawking, Zadie Smith, Virginia Woolf, C.S. Lewis, A.A. Milne, dei har alle vore studentar ved Cambridge.
- Kvinner kunne studere ved universitetet frå og med 1869, men blei ikkje uteksaminerte på linje med menn før i 1948.
- Som student skal visstnok Lord Byron ha hatt ein liten bjørn på rommet sitt, i protest mot at hundar ikkje var lov. Lord Byron viste til at det ikkje var noko eksplisitt forbod mot bjørnar i det ellers så fyldige reglementet.
Kjelder: Anglotopia.net, The Guardian, Schools-education.knoji.com, cam.ac.uk, chasefuture.com, cambridgehistorian.blogspot.no
