Clemet møtte UiB-forskarar
Kristin Clemet møtte marinforskarar i Bergen som oppvarming til den nye stortingsmeldinga om forsking som skal leggast fram våren 2005.
Utdannings- og forskingsministeren er ute på ein turne som omfattar 30 institusjonar for å samle innspel til arbeidet med forskingsmeldinga. Onsdag ettermiddag var turen komen til Universitetet i Bergen og Havforskingsinstituttet.
Det lukta passande nok fisk på vegen opp til møterommet i Høyteknologisenteret i Bergen. Der fekk Clemet eit første overblikk over den marine forskinga ved Universitet i Bergen av dekanus ved Det matematisk-naturvitenskapelege fakultet, Dag L. Aksnes. Han har tru på at forskarane når fram til utdannings- og forskingsministeren.
Grundig minister
– Eg ser det som svært positivt at Clemet kjem på besøk. Det er ein indikasjon på at ho tek forskinga og forskarane på alvor. I mine seks år i dekanatet har eg aldri opplevd ministrar som har gått så grundig til verks i forhold til grasrota i forskingsmiljøa.
Clemet på si side klargjorde nokre av hennar mål med forskingsmeldinga:
– Vi vil bringe opp nye tema – i dette ligg for eksempel ein gjennomgang av instituttsektoren, vi vil legge større vekt på kommersialiseringsaspektet og samarbeid med næringslivet, og vi vil fokusere på internasjonalisering.
Vil ha ny stillingskategori
UiB-forskarane var særleg opptekne av behovet for betre mekanismar i rekrutteringa av vitsskapsfolk. I følgje Aksnes er dette avgjerande for at norske forskingsmiljø skal lukkast i den internasjonale framtida.
– Utdanninga av vitskapsfolk for framtida vil krevje ei styrka fagleg, strategisk leiing og ein ny stillingskategori i fasen etter doktorgrad, som førebur til forskingsgruppeleiing som fast tilsett professor.
Mangelen på ein slik stillingskategori fører i dag til at forskarar blir rekruttert til stillingar før det er råd å vurdere fullt ut om dei har dei tilstrekkelege faglege og strategiske evnene som er nødvendig, i følgje marinforskarane.
Netthøyring
Fram til 15. oktober har Utdannings- og forskingsdepartementet (UDF) ei høyring på sine internettsider der utøvande forskarar, høgare grads studentar og andre som er involvert i forsking kan kome med synspunkt. Netthøyringa skal i følgje UDF fungere som supplement til Clemets besøksrunde.