Mikroalger

I 60-70 år har det vorte forska på mikroalger til mat – til fôr – til helsekost og mange andre gode føremål. I akvakultur er mikroalger brukt med stort hell i samband med startfôr  yngeloppdrett.

Men så er det lite anna lønsemd å finna innan algedyrking. På ein konferanse om mikroalger i Acre (Israel) på 70-talet var det delt ut Chlorella-pulver, og den gongen var det kinesisk produserte algepulveret til hjelp mot om lag 40 ulike sjukdomar/helseplager. Med slike utsikter kan ein produsera mikroalger til ein brukbar pris. Seinare fekk eg høve til å vitja det tidlegare  Institutt for hydrobiologi i Trebon, Tjekkia – med lang fartstid innan dyrking av mikroalger. Og det var ein produksjon som ikkje var til å verta oppglødd av. Prof. Amos Richmond (The Blaustein Institutes, Sede-Boker, Israel) har nyleg konkludert med at minimum  kostnad for produksjon av  mikroalger – med dagens teknologi – er 3500 dollar per tonn. Eg trur at prisen vert høgare her i landet.

Dersom dette er rett så er tanken om produksjon av mikroalger som drivstoff og til mange andre gode føremål berre ein fjern draum. No skal det satsast på dyrking av mikroalger i industriell skala også i Norge. Prosjekt både ved Universitetet i Bergen og i Nedre Telemark har eit miljøaspekt med fangst av CO2 – og ei produktside der feittsyrer, plast etc. er målet. Det vert truleg berre økonomisk avkastning til dei som kan selja dyrkingsanlegg og/eller utstyr til dyrkinga.