Onsdag vedtok fakultetsstyret ved Det psykologiske fakultet å opprette kurset Sorgutdanning.
– Dette er eit emne som skal gje teori og erfaringsbasert kunnskap om sorg, seier Kariane Westrheim.
Emnet er utvikla av av Atle Dyregrov ved Senter for krisepsykologi i samarbeid med Institutt for klinisk psykologi. Atle Dyregrov er også tilsett i ei bistilling på tjue prosent ved instituttet.
Sorg har ulike uttrykk
– Sorg er så alminneleg, seier Kariane Westrheim.
Som visedekan har ho har vore med i arbeidet med å utvikle det nye kurset. Sorgutdanninga rettar seg mot helsepersonell som sjukepleiarar, legar, psykologar og sosionomar. Det er og svært aktuelt for tilsette i kyrkja, som prestar og diakonar, helsepersonell, psykologar, sosionomar og andre. Sorgutdanninga er også innretta mot til dømes rådgjevarar, spesialpedagogar og andre i skulen.
– Sorg manifesterer seg på ulike måtar, men har også ulike uttrykk. Ulike kulturar og subkulturar kan ha sine eigne måtar å uttrykke sorg på, seier Kariane Westrheim.
Traumer
Sorga er ein viktig prosess ved tap. Men av og til kan sorga verte svær vanskeleg å handtere utan hjelp.
Kariane Westrheim held fram at for dei som arbeider tett på personar i sorg, er det viktig å vite noko om korleis menneske sørgjer, og korleis sorga kjem til uttrykk. Deltakarane vil og få kunnskap om kva som er vanlege sorgreaksjonar, og kva som reknast som tung og komplisert sorg.
– Det vil også verte fokus på korleis sorg og traumer verkar i forhold til kvarandre, seier Elisabeth Schanche.
Ho har vore involvert i arbeidet med den formelle utforminga av emnet.
– Målet med tilbodet er at deltakarane skal kunne bistå ved planlegging og gjennomføring av hjelp til enkeltpersonar og familiar som er ramma av sorg, seier Elisabeth Schanche.
Sorg og samfunnsnytte
Ein del av undervisninga vil bli lagt opp som praktiske oppgåver.
– Dette er eit godt tilbod som vil dekkje eit behov, og kome mange til gode, seier Kariane Westrheim.
– Sorg er så alminneleg
Ho seier at kurset er organisert som eit betalingskurs via Etter-og vidareutdanning (EVU), men er forankra på Det psykologiske fakultet. Fagpersonar frå Senter for krisepsykologi vil stå for ein stor del av undervisninga.
– Emneskildringa er godt forankra i teori, samtidig som det praktiske, kliniske elementet er inne, seier Kariane Westrheim.
Det psykologiske fakultetet har frå før ulike tilbod som blir gjeve innan EVU-ordninga.
– Å gje samfunnsrelevante tilbod er ein måte for oss å utføre universitetet sitt samfunnsoppdrag på, seier Kariane Westrheim.
