Etter intervju med tre av søkjarane konkluderte komiteen med at ingen av dei var kvalifiserte for stillinga som direktør for forskingsadministrativ avdeling.
– Det skuldast i hovudsak manglande leiarerfaring, dei var for ferske, seier universitetsdirektør Kjell Bernstrøm.
Måndag skreiv På Høyden at UiB no tilset ein ukjent direktør. Det stemmer ikkje, skriv Bernstrøm i eit lesarinnlegg.
Intervju torsdag
– Etter at komiteen hadde konkludert med at ingen av søkjarane var kvalifiserte, vart Heidi Espedal kontakta og beden om å vurdera å søkja, seier Bernstrøm.
Espedal er i dag konstituert i jobben som direktør for Forskingsadministrativ avdeling.
– Bemanningsbyrået Delphi, som me har brukt i heile prosessen, gjorde ei vurdering av henne. Ho var til intervju torsdag sist veke. Deretter valte ho å søkja stillinga. Komiteen gjorde det klart at ho var kvalifisert. Frå Espedal kom inn på søknadslista var namnet hennar offentleg som søkjar, seier Bernstrøm.
På Høyden ba om innsyn i søkjarlista fredag, og fekk lista, saman med debattinnlegget frå Bernstrøm, tysdag ettermiddag.
– Men uansett om ho formelt har søkt eller ikkje, så har Espedal vorte teke inn i prosessen utan at offentlegheita har fått vita om det.
– Det er noko som ofte er gjort. UiB står fritt til å invitera kandidatar inn i prosessen etter at søknadsfristen har gått ut, dersom dette er naudsynt for å rekruttera rett person til stillinga, seier Bernstrøm.
Han har tidlegare sagt at det er vanskeleg å få søkjarar til å ha namnet sitt på ei offentleg søkjarliste, og HR-direktør Janicke Stople stod ikkje på ei einaste liste før ho vart tilsett.
– No er det tredje gong denne stillinga er lyst ut, og de ender med den same kandidaten. Betyr det at det ikkje er så viktig med hemmeleghald likevel?
– Dette er ei svært spesiell stilling. Forskingsadministrativ direktør er ei universitetsspesifikk stilling, og det er ikkje mange som er aktuell for den.
– Positiv utvikling
Espedal har søkt stillingen dei to gongane jobben har vore lyst ut dei siste åra, utan å få han.
– Espedal gjer ein god jobb og det var naturleg å invitera henne inn i ein dialog, seier Bernstrøm.
Han seier at han synest forskingsadministrativ avdeling leverer godt.
– På kva måte?
– Rektoratet hadde ei valplattform, der dei mellom anna la vekt på at dei ønskjer vekst i eksternfinansiert forsking. Ein har fått opp aktiviteten, og gjer det mellom anna godt i Horisont 2020. Espedal er der ein viktig bidragsytar.
Tilsetjinga av direktør for forskingsadministrativ avdeling skal formelt skje neste veke. Men dersom tilsetjingsrådet ikkje godkjenner Espedal, eller ho sjølv vel å takka nei, er det ingen som er innstilt som nummer to på lista.
– Så då må de lysa ut på nytt?
– Ja. Eller ta eit nytt søk, seier Bernstrøm.
På Høyden har vore i kontakt med Heidi Espedal, som ikkje ønskjer å uttala seg før prosessen er ferdig.
