Mange MOF-tilsette nytta høve til å få gratis sørvis på sykkelen sin denne veka. Foto: Torstein Ravnskog
– Det kom mange syklar, og sykkelreparatørane jobba tre timar overtid, fortel Linda Vagtskjold.
Ho er seniorkonsulent ved Det medisinsk-odontologiske fakultetet og ansvarleg for den mobile sykkelverkstaden som stod utanfor BB-blokka i heile går.
– Dette er eit HMS-tiltak, seier Vagtskjold, og fortel at ideen kom frå Haukeland Universitetssjukehus. Dei har allereie hatt fleire dagar med mobile sykkelverkstadar for sine tilsette.
Gratis sørvis
– Dette er eit helsefremjande tiltak. Det er ei påskjønning til dei som allereie syklar til og frå jobb og ei oppmoding til andre om å prøva, seier Vagtskjold.
Heile onsdag kunne tilsette ved MOF levera syklane sine utanfor BB-blokka. Der fekk dei gratis sørvis på syklane sine, og mange fekk både stramma opp og skifta olje.
– Men dersom nokon måtte byta deler til sykkelen, måtte dei betala dette sjølve. Sørvisen var uansett gratis, seier Vagtskjold.
70 syklar
Om lag 70 syklar vart gjort sommarklare i går. Men Vaktskjold seier at det er for tidleg å seia om det vert fleire rundar med sykkelverkstad.
– Eg har inntrykk av at dette var ein suksess, men eg har ikkje fått så mange tilbakemeldingar endå, seier Vagtskjold.
Ho spelar gjerne ballen over til andre fakultet.
– UiB vil jo vera eit grønt universitet, og sykling er eit helsefremjande tiltak, seier ho.
Framsidefoto: Torstein Ravnskog