Britiske Marina Warner får årets Holbergpris. Det kunngjorde Holbergprisen sin styreleiar, Sigmund Grønmo, like etter klokka 9 torsdag. Warner er forskar, forfattar og kritikar, og får prisen for arbeidet ho har gjort med analysar av korleis eventyr og mytar vert omforma og endra for å forhandla med samtida vår.
Vil forska på det som er oversett
– Warner er ein svært interessant prisvinnar, med ein brei og allsidig bakgrunn. Ho er merittert, prisløna og svært anerkjent både som akademikar og forfattar. Med særleg vekt på folk sine førestellingar og fortljinga kombinerer ho fleire forskingsfelt og arbeider på tvert av disiplinar og kulturar, seier Grønmo i ei pressemelding frå Holbergprisen.
I same pressemelding seier Warner sjølv at ho har prøvd å utforska kjende, men ofte oversette, uttrykksformer som historier og folkelegsymbolikk for å forstå interaksjonen mellom kultur og etikk.
– Denne prisen gir meg og forskarkollegane mine ei fantastisk og også overraskande oppmuntring, seier Warner.
Den første boka ho ga ut, “Alone of all her sex: The Myth and the Cult of Virgin Mary”, viser Warner korleis kulturen rundt og bieltet av jomfru Maria har avgrensa kvinner sine rettar og sjølvforståing. Andre kjende bøker er “Joan of Arc: The Image of Female Heroism” og “Stranger Magic: Charmed States and the Arabian Night”. Warner har fått fleire prisar.
Klim-pris til dansk forskar
Nils Klim-prisen, som er prisen for yngre forskarar, går i år til danske Rebecca Adler-nissen. Ho er førsteamanuensis ved Institut for Statskundskab ved Københavns Universitet, og forskar på internasjonal politikk. Ho forskar særleg på EU og på forholdet mellom medlemsstatane, og ser mellom anna nærare på dei politiske aspekta ved eurosamarbeidet.
Utdeling i juni
Offentleggjeringa av prisen skjedde i år på heimebana til humanistane ved UiB: Bibliotek for humaniora. Sjølve utdelinga skjer i Håkonshallen 10. juni.
Holbergprisen blir i år delt ut for ellevte gong, og prisen blir ofte framstilt som ein <<nobelpris>> innan samfunnsvitskap, teologi, juss og humaniora, for å løfte fram desse faga. Universitetet i Bergen har fått i oppgåve å administrere prisen, mens forskarklubben Det Norske Vitenskaps-Akademi har fått i oppgåve å dele ut Abelprisen i matematikk.
Utdelinga er no avslutta. Men her kan du sjå utdelinga i opptak. Programmet byrjar først 06.30 minutt inn i opptaket.
