Førebur fullt innrykk

Førstkomande tirsdag samlast 75 PhD-kandidatar frå 37 land i Bergen. Det er tid for Bergen Summer Research School (BSRS), den fjerde i rekka. I lokala til Uni Global har det vore hektiske førebuingar sidan onsdag. Dei siste detaljane blir lagt på plass, slik at alt er klart når deltakarne vert henta på Flesland på søndag. Utsendingane til flyplassen er i år, som tidlegare år, engasjerte studentassistentar som arbeider som medhjelparar i forkant av og under BSRS.

– Deltakarane på BSRS har vore svært nøgde med den oppfølginga dei får under tida i Bergen. Ordninga med studentassistentar bidreg til at dei kjenner seg trygge og velkomne, seier Laura Drivdal. Ho har arbeida som studentassistent på BSRS heilt sidan den første sommarskulen gjekk av stabelen i 2008 og hjelpt deltakarar med alt frå spørsmål om den norske maten til restaurantbesøk, IT, praktisk organisering og å assistere kursansvarlege.

Artikkelen held fram under biletet.

(Foto: Åse Johanne Roti Dahl/logo på framside: BSRS)

– Høve til å halde seg oppdatert
Det er ikkje berre deltakarane som har noko å hente på ordninga med studentassistentar. Også studentassistentane får mykje tilbake for arbeidet for BSRS, mellom anna høve til å halde seg oppdatert på det som skjer innanfor fagfeltet andre stader i verda.

– Som studentassistent får ein treffe andre som deler dei same faglege interessene. Eg har blitt kjent med mange som eg framleis har kontakt med, og det er ikkje tvil om at det er nyttig. På Facebook postar tidlegare deltakarar mellom anna informasjon om stillingar og konferansar, seier Brando Palacios.  

Palacios var sjølv deltakar under den første BSRS i 2008. Sidan har han halde fram som studentassistent.

– Det er jo fantastisk å til og med få betalt for å halde på med ein så artig jobb, seier han.

Artikkelen held fram under biletet.

(Foto: Åse Johanne Roti Dahl)

Globalt borgarskap
Erfaringane med sommarskulen har så langt vore overveldande positive, ifølge leiar for BSRS, Kjersti Fløttum. Deltakarar på BSRS har karakterisert sommarforskingsskulen som ei opplæring i globalt borgarskap. Dette er ei tilbakemelding Fløttum set stor pris på. Høvet til å byggje internasjonale nettverk er ein av grunntankane bak sommarskulen. I tillegg kjem det tverrfaglege.

– Her møtast doktorgradskandidatar med ulik fagleg bakgrunn frå heile verda. Det blir store og spennande diskusjonar når dei samlast, seier Fløttum.

Ho trur at diskusjonar mellom ulike fag og kulturelle ståstader berre vil bli viktigare i åra som kjem.

– Jo større dei globale utfordringane er, dess større er behovet for samarbeid og forståing, seier ho.

Fløttum kjenner til at fleire av deltakarane held på kontakta etter deltaking på BSRS, og at det mellom anna er oppretta grupper på Facebook. BSRS har likevel eit sterkt ønske om å få på beina ei alumniverksemd for deltakarane. Førebels står det på ressursar.

– Alumniverksemd hadde vore svært verdifullt. Blant deltakarane på BSRS finn vi framtidige forskarar og leiarar, seier ho.

Fag i eit heilskapleg perspektiv
Til årets BSRS var det om lag 260 søkjarar. Av desse har 75 fått plass, deriblant 13 frå Bergen. Søkjarane vert vurderte av kursleiar i samarbeid med lærarane, og dei må levere utdrag frå forskinga si. Dei som går vidare er godt kvalitetssikra, ifølge Fløttum.

– Vi har svært dyktige doktorgradskandidatar. Det gjer at sommarskulen gjev eit godt fagleg utbytte, og det er det viktigaste siktemålet, seier ho.

Temaet for årets sommarskule er normer, verdiar, språk og kultur. Dermed er hovudtyngda av kurs i år å finne innan dei humanistiske og juridiske fagfelta. Dei føregåande sommarskulane har dekka fagfelt som global fattigdom, klima og miljø og global helse. Utgangspunktet for kurstilbodet på BSRS har vore å sjå universitetet og samarbeidspartnerane si verksemd i eit heilskapleg perspektiv, og med årets satsing har alle fakulteta ved UiB vore tungt involverte i BSRS.

– Vi har ønska å få med så mange medspelarar som mogleg kvart år. Samstundes har det vore viktig at ikkje byrden har blitt for stor. Ordninga med å fordele arbeidsmengda og deltakinga mellom dei ulike fagmiljøa ved universitetet frå år til år, har fungert bra, seier Fløttum.

BSRS har også eit mål om å styrke kontakta med samfunnet utanfor akademia.

– Det gjer vi med opne debattmøter i samarbeid med mellom anna Bergen Næringsråd, seier ho.

Artikkelen held fram under biletet.

(Arkivfoto: Olav Røli)

Skal vidareførast
BSRS starta i utgangspunktet som eit fireårig prosjekt. Årets sommarskule kunne dermed ha vore den siste. Fløttum, som tok initiativet til BSRS, er difor svært glad for at Universitetet i Bergen har gjeve klare signal om at sommarskulen skal førast vidare. Det er førebels uklart i kva form den blir ført vidare, men det er ifølge Fløttum aksept for at møtet mellom nord og sør er ei hovudsak. Det som derimot er klart, er at ho takkar for seg som leiar etter avviklinga av årets sommarskule.

– Vi møter stor velvilje frå ulike aktørar på universitetet, både administrativt og fagleg, og har også hatt eit godt samarbeid med Uni Research, CMI, NHH og Høgskolen i Bergen. Det hastar no å få på plass ein ny leiar, men vi skal nok få det til. Det er godt at andre tek tak i sommarskulen, og kanskje har dei nye idear og tankar som gjer at BSRS kan vidareutviklast, seier ho.