Fysiolog får Fridtjof Nansens belønning for 2002

Æresprisen blir delt ut frå Nansenfondet som er administrert av Det Norske Videnskaps-akademi.

– Det er hyggeleg - og overraskande- å få prisen, seier Knut Aukland som er 73 år og ikkje har vore i universitetssystemet dei siste seks åra. Fysiologen har likevel langtfrå vore nokon passiv pensjonist, han har hatt seniorstipend frå Noregs forskingsråd og har i det siste drive forsking på hobbybasis.

I innstillinga heiter det at Knut Aukland har levert nyskapande forskingsarbeid av svært høg kvalitet på fleire område. Primært innan nyrefysiologi, som er fordeling av blodstrøm i ulike deler av nyrene, og vidare innan såkalla transkapillær væskebalanse, som tyder vassinnhaldet i vev utanfor blodbanene og det som er i blodet. Innanfor nyrefysiologi er det viktig med utvikling av målemetoder og det viktigaste bidraget han har gjeve er innanfor metodeutvikling. I tillegg til eigne oppdagingar har desse ført til mange viktige oppdagingar både innan basal sirkulasjonsforsking og meir klinisk retta forskning.

Hans seinaste bidrag er ein målemetode for å studera regionale forskjeller i nyrefunksjon. Slik forklararar han det sjølv:

– Menneskenyra har omlag 1 million små filter. Dei filtrerer veske ut i eit rørsystem (tubuli). I ei menneskenyre blir det filtrert omlag 180 liter i døgnet. 179 av dei blir sugd tilbake igjen til blodet. Dette er avhengig av blodsirkulasjon og blodtrykk og det er eindel forskjell på desse glomeruli (filtrasjonseinigane). Vi var interessert i om reguleringa var forskjellig i dei som var plassert djupt og overfladisk i nyrene, dermed måtte vi utvikla ein meode for målingar, seier Aukland, som gjorde dette saman med Olav Tenstad.