God bakgrunn for journalistkarriere

- For meg var det viktigare å lære om faget eg skulle skrive om, seier Eilertsen. Ho meiner det er grenser for kva ein kan lære av ei journalistutdanning.

- Eg trur det er viktigare å jobbe og syne interesse for journalistikken. Hadde eg vore 19 år i dag, ville eg ha teke ulike samfunnsfag, og gjerne eit år med økonomifag. Økonomi er sinnssjukt nyttig. Juss også. Pressa skal dekke ny kriminalitet og forbrukarrettar, og guide folk i eit komplekst lovverk. Skal vi bli tekne seriøst, så må vi berre lære oss ein del om fagområdet vi skal dekke.
Sjølv er ho siviløkonom frå NHH, og har hovudfag i samanliknande politikk frå Universitetet i Bergen. Ho kom til Bergens Tidende som økonomijournalist, og jobba i tre år før ho vart politisk redaktør. Og enno er ho ikkje meir enn 33.

- Interessefeltet mitt var politisk økonomi. Hovudfaget er det kjekkaste eg har gjort, då fall liksom alt på plass.
Likevel vil ho ikkje tilrå nokon å kopiere utdanningsløpet hennar. Det kan bli litt for mykje av det gode.

- Men ei universitetsutdanning lærer deg ein analytisk måte å tenkje på. Du lærer å bli kritisk. Og du blir sinnssjukt flink til å sette deg inn i ting raskt, til å skumme masse sider og trekke ut essensen. Det er du jo nøydd til, når du har fire tusen sider pensum på grunnfaget og oppdagar at du ikkje har sjanse til å lese alt. Dessutan får du eit nettverk som er uvurderleg. Folk eg studerte med, sit no i posisjonar rundt omkring, i bedrifter og i departementa. Det sparar mykje tid, forklarer ho.
Då Trine Eilertsen vart henta inn som økonomijournalist, fekk ho ein fadder i Bergens Tidende som lærte henne mykje om det journalistiske handverket. Det kan ikkje alle rekne med å få.

- Noko dei kunne hatt på universitetet, er eit kurs i journalistisk metode og etikk, litt om kva rolle pressa har og kor langt ein kan gå. Det kunne vere nyttig både for dei som lurer på å bli journalistar, og for dei som skal bli forskarar og publisere forskinga si i media, meiner ho.
Sjølv kunne ho valt ei internasjonal karriere i Statoil, eller ein plass som aspirant i utanrikstenesta istadenfor journalistkarriera. Det var lysta til å skrive som avgjorde.

- Å skrive er det kjekkaste med heile jobben. No er det vanskeleg å få fast jobb som journalist, men er ein flink og målretta, kan ein klare det. Meld deg til vikarlister, ta kveldsvakter. Dess meir du arbeider, dess flinkare blir du.