Griegakademiet spelar opp
Under Festspillene nyttar Griegakademiet høvet til å syne fram kva dei har jobba med vinteren igjennom. Kvar dag vankar det ulike konsertar, og operaen «Dido and Aeneas» blir høgdepunktet.
I eit rom i andre etasje på Griegakademiet samlast koret i Purcell-operaen «Dido and Aeneas» til danseprøve. Framsyninga skal i det store og heile vere i boks no, men framleis er det småting som må terpast på. I dag fungerer ikkje cd-spelaren, og instruktør Silje Aker Johnsen må synge melodien til sjømannsdansen.
– De kan godt løfte armane litt meir når de gjer dei hælsparka, seier ho til sjømennene, og demonstrerer korleis ho vil ha det.
Henry Purcell komponerte operaen i 1689, og handlinga er basert på Vergil-eposet Aeneiden. Temaet i operaen er, som så ofte elles, ulukkeleg kjærleik.
– Dido er dronning, og mannen hennar døyr. Så kjem Aeneas, som er prins av Troja, og dei blir forelska i kvarandre. Men Aeneas misser livet på havet, og Dido døyr av hjartesorg, fortel Kristi Anna Isene. Ho studerer song, og er med i koret i operaen.
Operaen er ei storsatsing for Griegakademiet. Om lag 25 songarar og musikarar er med på framsyninga.
– I dag øver vi berre på dansen. Det er ikkje lett, for vi skal jo vere så elegante, vedgår Isene.
«Dido and Aeneas» blir spelt 28.-30. mai, klokka 13 og klokka 22. Framsyningane finn stad i prøvesalen på Griegakademiet, og varer om lag ein time.
Kvar dag til og med laurdag 31. mai er det også stikk-innom-konsertar på dagtid, med studentar frå akademiet. Konsertane er i Grieghallens foajé eller på Griegakademiet, og har gratis inngang.