Abelprisen vert årleg utdelt til matematikarar som har gjort framifrå vitskapleg arbeid innan faget. Årets pris vart tildelt den amerikanske matematikkprofessoren John Milnor. Sjølve prisoverrekkinga finn stad i Oslo, men i samband med utdelinga vert det også eit arrangement og foredrag i Bergen 26. mai.
Kunnskapsfest
Tiltak og arrangement for å fremme interessa for matematikk blant barn og unge er sentralt for Abelprisen, og arrangementet på Festplassen komande torsdag blir ein kunnskapsfest der 700 skuleelevar frå 5.-7. klasse får leike og spele seg til mattekunnskapar. H. M. Dronning Sonja har takka ja til invitasjonen om å vere til stades under arrangementet.
På Festplassen blir det rebusløp og ei rekke stasjonar med aktivitetar knytt til matematikk.
– Vi samarbeider også med Permanenten om matematikk i kunsten, seier Hans Munthe-Kaas, professor ved Matematisk institutt.
Banebrytande matematikk
Abelprisvinnaren John Milnor kjem også til Bergen for å halde eit foredrag. Utgangspunktet er det mest berømte arbeidet hans, som dreier seg om kva vi meiner med at overflata på ei kule er ’glatt’. I 1957 oppdaga Milnor, til si eiga og alle andre matematikarar si store overrasking, at dette spørsmålet ikkje er så enkelt som ein skulle tru.
– Oppdaginga hans av eksotiske sfærer opna opp differensialtopologi som ei ny grein av matematikken, seier Munthe-Kaas.
I foredraget gjev Milnor ei oversikt over meir enn 100 år med forsking på desse områda. Foredraget er mynta på studentar og forskarar ved Universitetet i Bergen, men Munthe-Kaas understrekar at det er ope for alle interesserte. John Milnor er ein matematikar som ofte har rokka ved etablerte sanningar innan fagfeltet.
– Milnor har gjort fleire vitskaplege arbeid som i stor grad har overraska matematikarar verda over, seier Munthe-Kaas.
