Halos blir dobbelt så stor
Halos og Avdeling for helse er slått saman til ei Unifob-eining frå 1.januar 2005. Nyskapningen blir heitande Halos.
Direktør for den nye eininga som kjem til å ha nærmare 140 tilsette (90 årsverk) blir Hege Randi Eriksen. Fram til i dag har Eriksen vore leiar for gamle Halos. Stedfortredar for direktøren blir tidlegare leiar av Avdeling for helse, Bente E. Moen. Den nye avdelinga blir ei av dei største avdelingane i Unifob AS med ei budsjettert omsetjing på 81 millionar kroner.
– Vi er veldig glade for denne samanslåinga. Begge sider har vore einig om dette, for sjølv om det vil gjere oss i overkant store, vil det gjere at vi fagleg blir sterkare. Vi trur at vi dermed blir endå meir attraktive for eksterne oppdragsgjevarar, seier direktør Hege Randi Eriksen.
Større breidde
Eriksen meiner nye Halos vil få større breidde enn før, mellom anna vil dei få inn odontologi i den faglege portefølgja og dei vil bli litt tyngre på det medisinske feltet,. Ho legg til at hovudvekta hjå forskingsaktivitet hjå Halos framleis vil ligge i skjæringspunktet mellom medisin og psykologi. Medan gamle Halos og Avdeling for helse inntil no har vore typisk fakultetsorienterte ønskjer den nye avdelinga å utvikle sin eigen tematiske profil.
Avdeling for helse har inntil no i hovudsak vore eit administrativt fellesskap som består av Seksjon for arbeidsmedisin, Bivirkningsgruppen for odontologiske biomaterialer, Nasjonalt formidlingssenter innenfor geriatri, prosjekter innenfor registerepidemiologi og Noklus. I haust var det registrert 54 tilsette på Avdeling for helse. Talet på tilsette blir meir enn dobla når dei no er slått saman med gamle Halos. Denne avdelinga har bestått av Regionssenter for barn og unges psykiske helse, Barnevernets utviklingssenter på Vestlandet, Nasjonalt ryggnettverk og prosjekt under Hemilsenteret.
Alle desse sentra og prosjekta blir no å finne under Halos-paraplyen. i tillegg kjem Nasjonalt kompetanse senter for legevakt medisin.
Fysisk spreidd
Samanslåinga av mange ulike einingar vil føre til fleire folk og fleire møtestader – på godt og vondt.
– Vi er fysisk spreidd over heile byen. Der ligg det ei utfordring, men vi har velfungerande leiargrupper og veldig flinke folk i avdelinga så eg trur absolutt vi skal klare å trekke saman, slik at det blir utført meir og betre forsking, avsluttar Hege Randi Eriksen.