Frode Thorsen leiar Griegakademiet, Reidar Lie er instituttleiar ved Institutt for filosofi og førstesemesterstudium (FoF), og Johan Myking er øvste leiar for Institutt for lingvistiske, litterære og estetiske studium (LLE). Alle tre står på søkjarlista når stillingane som instituttleiarar no er lyst ut for nye fire år.
Interne og eksterne
Til alle tre stillingane er det fleire søkjarar, både interne og eksterne. Til stillingen ved Griegakademiet står i tillegg til Thorsen desse på lista:
Peter Edwards, postdok ved Instituttvitskap ved UiO
Melania Bucciarelli, universitetslektor ved NTNU
Connie Reksten, førsteamanuensis Institutt for arkeologi, historie, kultur- og religionsvitskap ved UiB
Jørgen Langdalen, forskar ved Nasjonalbiblioteket
Sandra Halverson har søkt stillinga som instituttleder ved FoF. Ho er i dag professor i engelsk språk både ved NHH og UiB.
Søkt har òg Carola Freiin von Villiez, som er professor ved FoF, og Rasmus Tore Slaattelid, som er førsteamanuensis ved Senter for vitskapsteori.
Danske til LLE?
Til stillinga som instituttleiar ved LLE er det òg kome inn fire søknader. I tillegg til Myking er desse Anders Fagerjord, som er førsteamanuensis i medievitskap ved UiO og Høgskolen i Gjøvik, Søren Fauth, som er professor ved Institut for Æstetik og Kommunikation ved Aarhus Universitet, og Eystein Dahl, som er instituttleiar ved Institutt for språkvitskap ved Universitetet i Tromsø.
Tilsetjing i mai
Dekan Margareth Hagen seier at fakultetsstyret tek sikte på å tilsetja instituttleiarane i møtet 5. mai.
– Eg synest det er flott at det er fleire søkjarar, og bra at det òg er nokre eksterne. At det er fleire søkjarar til kvar stilling, er med på å gi dei eksisterande instituttleiarane legitimitet. No vert dei utfordra, seier Hagen.
Tilsetjinga skjer ved at eit innstillingsutval med prodekan som leiar og fire andre medlemmer kjem med ei innstilling til fakultetsstyret.
– For å vera fagleg leiar, må ein vita noko om korleis det er å vera forskar. Men det er ikkje krav om professorkompetanse, seier Hagen.
Då instituttleiarstillinga ved Institutt for framandspråk var lyst ut i januar i fjor, sa Steinar Vagstad, hovudtillitsvalt for Forskarforbundet ved UiB, at ryggmargsrefleksen hans sa at universitetet bør syta føre at eventuelle eksterne søkjarar som får tilbod om instituttleiarjobben, bør få lovnad om ei retrettstilling etter at åremålsperioden har gått ut. At eksterne søkjer stilling som instituttleiar er eit ganske nytt fenomen ved UiB.
– Dette vert nok ein del av forhandlingane dersom ein ekstern kandidat skulle få tilbod om jobben, seier Hagen.
