Søknadsfristen til å søkja høgare utdanning gjekk ut 15. april. Tala som Samordna opptak presenterte onsdag, viser at det er 413 fleire søkjarar som har UiB som førsteval i 2015 enn det var i 2014. Det er ein auke på nesten fem prosent.
Ser ein på fakulteta, er det Det humanistiske fakultetet som har størst framgong. Auken er på 12,7 prosent frå i fjor. Det samfunnsvitskapelege fakultetet har ein auke på 6,7 prosent.
Framgong for skulefaga
Margareth Hagen er dekan ved Det humanistiske fakultetet, og svært glad for tala ho har fått presentert.
– Dette er kjempebra tal for oss. Fransk og tysk gjer det bra, det same gjer historie og nordisk. Eg synest det er kjekt at skulefaga går fram, seier Hagen.
Nordisk, som er ein del av Institutt for lingvistiske, litterære og estetiske studium, har vorte delt opp i fleire mindre fag. Hagen innrømmer at ho var litt spent på korleis det ville slå ut.
– Men nordisk har mange søkjarar, og det er utruleg viktig. Me ser òg at lektorutdanninga har ein auke, seier Hagen.
Dersom ein ser på dei ulike fagområda, er det økonomi, administrasjon og leiing som har størst auke i søkjartalet, med 48,99 prosent. Deretter kjem informasjonsteknologi og informatikk, deretter historie, religion, idéfag, filosofi og arkeologi.
– Det er spanande at filosofi gjer det så bra, seier Hagen.
Auken for filosofi er på heile 82,9 prosent samanlikna med i fjor.
Auke på 49 prosent
Dersom ein ser på kva fakultet som har flest søkjarar, er det Det samfunnsvitskapelege som ligg på topp. Deretter kjem Det juridiske fakultetet, så Det humanistiske fakultetet.
Søknader til studia i samfunnsøkonomi aukar med 49 prosent i forhold til i fjor. Det nye bachelorprogrammet i datatryggleik gjer det òg bra, med 57 søkjarar – eller 3,8 per studieplass. I motsett ende finn ein studiet i petroleums- og prosessteknologi. Her er det 65,9 prosent færre søkjarar enn i fjor, kjem det fram i ei pressemelding frå UiB. Faggruppa teknologiske fag, ingeniør, sivilingeniør, arkitekt og maritim/nautikk har ein nedgang på over 47 prosent.
Viserektor for utdanning, Oddrun Samdal, seier pressemeldinga at det er veldig inspirerande å sjå ein stor auke i talet på søkjarar som har UiB som førsteval.
– Det fortel meg at søkjarane har ein høg tillit til at UiB kan gi dei ei utdanning av høg kvalitet og med dyktige førelesarar, moderne undervisnings- og vurderingsformer og eit engasjermande studiemiljø. Dette stiller krav til oss, og me skal jobba hardt for å innfri forventningane til dei som møter oss som UiB-studentar i august, seier Samdal.
Nesten 128 000 har søkt
Hos Høgskolen i Bergen er det fleire søkjarar til både lærarutdanning og barnehagelærarutdanning. Sjukepleiarstudiet opplever òg ein auke. Søkjartala til ingeniørutdanninga er omtrent som i fjor, men det er færre som søkjer dei direkte oljerelaterte fagområda, heiter det i ei pressemelding frå HiB.
– Dette året er det dei klassiske studia innan byggfag, landmåling og elkraft som aukar mest. Alt i alt kan me konkludera med at norske ungdommar framleis ønskjer å ta ei teknologisk utdanning, seier HiB-rektor Ole Gunnar Søgnen i pressemeldinga.
Totalt sett er det om lag 127 900 søkjarar til høgare utdanning i år, heiter det i ei pressemelding frå Kunnskapsdepartementet. Det er 8 000 fleire enn i fjor. Til studium innan realfag er det over 11 prosent fleire søkjarar enn i fjor, mens søkninga til helse- og sosialfagutdanningene har auka med nesten 10 prosent frå 2014. Lærerutdanninga har òg ei positiv utvikling med ein auke på åtte prosent.
– Eg er nøgd med den svært gode søkinga til høgare utdanning. Regjeringa er spesielt nøgd med den positive utviklinga for lærarutdanninga, helse- og realfag, seier settestatsråd Elisabeth Aspaker i pressemeldinga.
