Forelda styreansvar

Universitetsdirektør Kjell Bernstrøm hadde allereie før styremøtet 27. november avgjort at dokumentet der jussprofessor Rune Sæbø gjorde greie for om styret i skandaleselskapet Innovest AS har eit juridisk ansvar for dei mange kritikkverdige praksisane i selskapet, skulle haldast hemmeleg.

Styreansvar gjeld ikkje
Direktøren viser til §15 i offentleglova, som gir høve til å hemmeleghalde dokument som gir det offentlege råd om korleis dei skal stille seg i ei sak, om det er «påkravd av omsyn til ei forsvarleg ivaretaking av det offentlege sine interesser i saka».

– Vi har konkludert etter ei solid juridisk input til styret i saka at det ikkje er grunnlag for å gjere styreansvaret gjeldande, sa UiB-rektor Dag Rune Olsen då På Høyden intervjua han etter styremøtet 27. november 2014.

Professor Sæbø, som har gjort vurderingane for UiB, har mellom anna vore vikardommar i Høgsterett, og har jobba vitskapleg med nettopp styreansvar. Vurderinga til UiB står difor truleg på trygg, juridisk grunn. 

Gir likevel ikkje ut vurdering
Men trass i at UiB har gjort det klart at dei ikkje vil dra det tidlegare Innovest-styret for retten, og at UiB dermed har tatt si endelege avgjerd i saka, vil både UiB og Kunnskapsdepartementet hemmeleghalde informasjonen om ansvaret for den mykje omtalte Innovest-skandalen.

Som På Høyden tidlegare har skrive måtte eigarane inn med millionar av kroner for å dekke tapet etter høgrisiko-investeringar i innovasjonsselskap. Dette har kosta det offentlege 15 millionar kroner i reine utgifter for Helse Bergen eller tapte overføringar til UiB frå Stiftelsen Universitetsforskning. Saka har fått stor merksemd i mediene, og UiB og Helse Bergen har varsla sivilt søksmål mot professor emeritus Amund Gulsvik, og den tidlegare Innovest-direktøren Arne Godal. Helse Bergen har dessutan meld medisinprofessor Per Bakke til politiet, og varsla sivilt søksmål mot han etter at han tok ut 3,38 millionar kroner i løn mens han var på eit forskingsopphald i USA. Politietterforskinga resulterte i at politiet ikkje fann nokon grunn til å reagere strafferettsleg mot Bakke. 

Sivilombodsmannen
Dokumentet som UiB og Kunnskapsdepartementet ønskjer å halde hemmeleg konkluderer altså med at eit eventuelt styreansvar er forelda. Men det inneheld truleg og ei velkvalifisert vurdering om kor stort ansvar styret har hatt i saka. På Høyden kjem  difor til å klage avslaget om innsyn til Sivilombodsmannen. Styret i Helse Bergen har ikkje drøfta ansvaret til Innovest-styret. I tillegg har helseforetaket brukt økonomidirektør Eivind Hansen til å rydde opp i skandalen, trass i at Hansen er direkte underlagd Stener Kvinnsland, som sat som styreleiar for Innovest i ei årrekkje.