«Kick-off» for stipendordning
Ruhrgas-stipendprogramma har eksistert sidan midt på 80-talet, og har støtta både utveksling, forskaropphald og konferansar. No er det kome eit stipendprogram for statsvitskap, som erstatning for det tidlegare programmet i historie. Forskingsrådet og dei statsvitskaplege institutta ved UiB inviterer til eit ope «kick-off» seminar fredag 6. februar.
Det tyske energikonsernet Ruhrgas AG finansierer programma, som deler ut 60-70 stipend kvart år innanfor ulike fagfelt. For å auke talet på norske studentar som vel å studere i Tyskland, er det altså no oppretta eit program i statsvitskap. Programmet vil ha om lag 7,5 millionar til fordeling fram til 2007.
– Stipendordninga gjeld både masterstudentar og etablerte forskarar som ønskjer forskingsopphald i Tyskland. Men denne gongen rettar vi spesielt fokuset mot masterstudentar, fortel professor Stein Kuhnle ved Institutt for samanliknande politikk (ISP). Han sit i styringskomiteen som har ansvar for tildelingar under programmet.
– Programmet opnar for å søke stipend kvar som helst i Tyskland, men frå tysk side trekk ein spesielt fram Berlin som studiestad, seier Kuhnle.
Programmet har oppretta bilaterale kontaktar med Freie Universität i Berlin, Universität Potsdam og Humboldt-universitetet i Berlin.
På seminaret fredag vil Kristin Eikeland Johansen for Norges forskingsråd orientere om stipendprogrammet, og professor Werner Jann frå Potsdam-universitetet og dr. Ingo Peters frå Freie Universität, begge i Berlin, vil presentere studieprogram ved sine institusjonar. I tillegg kjem Nils Morten Udgaard, utanriksredaktør i Aftenposten, for å snakke om samlinga av Tyskland og utvidinga av EU.
Seminaret finn stad fredag 6. februar kl. 10.15, på møterommet ved ISP, Christiesgt. 15, og er ope for alle interesserte. Søknadsfristen for neste stipendfordeling er 1. mars.