Tysdag handsama fakultetsstyret ved Det humanistiske fakultetsstyret ei sak om tilsetjing av førsteamanuensis i latinamerikansk litteratur. Som På Høyden skreiv tidlegare i veka, reagerte både søkjar Hans Jacob Ohldieck, professor Gisle Selnes og professor emeritus Birger Angvik på saka. Dei meinte at dei to interne kandidatane ikkje hadde vorte godt behandla. Bakgrunnen for det var at komiteen svarte på Ohldieck sin merknad med at dei hadde rangert søkjarane med ferdig doktorgrad over dei som ikkje hadde disputert.
– Ikkje overtydande argumentasjon
Saka vart handsama bak lukka dører, etter ein lang debatt om meiroffentlegheit.
– Me har underkjent den sakkunnige komiteen sitt arbeid. Argumentasjonen var ikkje overtydande, seier førsteamanuensis Jan Heiret, som representerer Institutt for arkeologi, historie, kultur- og religionsvitskap.
Det betyr at stillinga no vert lyst ut på nytt.
– Faget treng denne stillinga, så det er ingen grunn til å venta med å lysa henne ut. Men slik saka til styret var førebudd og lagt fram, fann styret at ho ikkje var godt nok førebudd, seier Kristoffersen.
– Kor ofte vel styret å lysa ut stillingar på nytt?
– Eg har ikkje noko eksakt tal. Men det skjer frå tid til anna – av ulike grunnar.
– Lyser ikkje ut for interne
Både Selnes og Angvik reagerte på at stillinga vart lyst ut like før to interne kandidatar var ferdige med sine doktorgradsarbeid. Etter det På Høyden kjenner til, var ikkje tidspunkt for utlysing noko som vart diskutert i møtet.
–UiB lagar planar for rekrutteringspolitikk. Men det hjelper ikkje med fine ord dersom interne søkjarar ikkje vert vurderte på lik linje med dei andre. I denne saka går det ikkje fram kva den faglege grunngivinga er for å rangera dei interne søkjarane etter dei eksterne, seier Heiret.
Kristoffersen understrekar at fakultetet ikkje lyser ut stillingar for at interne kandidatar skal få dei.
– Men dei skal behandlast på same måte som andre, seier han.
– Prinsipielt viktig
Hans Jacob Ohldieck er nøgd med vedtaket.
– Først og fremst fordi fakultetsstyret sitt vedtak er prinsipielt viktig. Det gir signal om skjerpa krav til denne typen komitéarbeid, og til at opne og kvalitetssikra kriterium må ligga til grunn.
