Mange stemte ved rektorvalet
Langt fleire nytta stemmeretten sin ved dette rektorvalet enn ved valet i 2001 og 1998. Dette gjeld både vitskapleg tilsette, studentar og teknisk/administrativt personale. Sigmund Grønmo og Anne Gro Vea Salvanes hadde klart fleirtal i to av gruppene.
– Vi håpa å komme opp i over femti prosent deltaking frå dei tilsette og 10 prosent for studentane. Det klarte vi for alle dei tre gruppene, og med relativt god margin for to av dei. Det er vi veldig godt nøgde med. Særskilt er det gledeleg med den store auken i studentstemmer seier Per Gunnar Hillesøy frå Kollegiesekretariatet og Valstyret.
Hillesøy trur at den gode valdeltakinga har to hovudårsaker. For det første er valet elektronisk, slik at det har blitt langt lettare å stemme, og for det andre har det vore reell konkurranse og mykje merksemd om valet.
Studentane meir på banen
53,9 prosent av dei vitenskaplig tilsette, 50,1 prosent av dei teknisk/administrativt tilsette og 13,4 prosent av studentane stemte ved årets rektorval. Til samanlikning stemte 45,3 prosent av vitskapleg personale ved rektorvalet i 1998, 43,6 prosent av dei teknisk/administrative og fem prosent av studentane.
Ved prorektorvalet i 2001 stemte 37,1 prosent av dei vitskaplege, 37,9 prosent av dei teknisk/administrative og berre 2,1 prosent av studentane. Rektorvalet i 2001 gjekk i Kollegierådet som valforsamling, fordi det berre var ein kandidat.
Grønmo vann i to av gruppene
Sigmund Grønmo og Anne Gro Vea Salvanes hadde flest stemmer både hjå dei vitskapleg tilsette og studentane med 55,1 og 60,0 prosent av stemmene, medan Rune Nilsen skora best blant teknisk/administrativt personale med 44,2 prosent.
Rune Nilsen fekk 29,0 prosent av stemmene frå dei vitenskapleg tilsette, medan Leiv Sydnes fekk 15,5 prosent frå denne gruppa. Sigmund Grønmos fekk 39,2 prosent av stemmene frå teknisk administrativt tilsette, medan Sydnes 16,3 prosent av stemmene. Frå studentane fekk Rune Nilsen 21,6 prosent medan Leiv Sydnes fekk 17,8 prosent.
Det er ikkje mogleg å skilje ut dei dei fakultetsvise resultata.