Navn: Kristin Svartveit
Alder: 36
Ny jobb: Administrativ koordinator for UiB Global
Tidligere jobb: På Uni Bjerknessenteret med forskningsadministrasjon og formidling
Utdanning: Hovedfag i Sosialantropologi
– Kva går den nye jobben din ut på?
– Eg skal jobbe for å synleggjere og fremje global og utviklingsrelatert forskning ved UiB. UiB Global er ein paraplystruktur i UiB-systemet, og skal vera ein tverrfagleg møteplass for forskning på dette feltet. Som administrativ koordinator skal eg arbeide opp mot fagmiljøa med informasjon og støtte i søknadsprosesser, og generelt hjelpe til å drive fram gode forskningsprosjekter og samarbeid. I tillegg driv eg sakshandsaming innan utviklingsrelaterte tema og samarbeid mellom Universitetet i Bergen og partnarar i sør.
– Har du en jobb kor andre ansatte vil komme mykje i kontakt med deg?
– Absolutt! Det er det jo også på mange måtar mi oppgåve å sørge for. Ei viktig oppgåve er å synleggjere all forskinga som allereie fins ved UiB på dette feltet. Difor planlegg me mellom anna ei besøksrunde til alle fakulteta no i vårsemesteret. Me ynskjer å presentere oss for fagmiljøa, og la dei presentere seg for oss, slik at me saman kan finne gode måtar å setje fokus på forskninga, og ikkje minst formidle kontaktar, kople miljøer og skape nye samarbeid. I tillegg kjem me til å invitere folk til oss i Jekteviken på seminarer og informasjonsmøter. UiB Global skal fyrst og fremst vera ein ressurs for forskingsmiljøa, og då er det viktig å ha god og direkte kontakt med forskarane.
– Trivs du godt så langt?
– Veldig godt! Sjølv om UIB Global framleis er i oppbyggingsfasen er det mange interessante prosjekt på gong, og me har mange planar. Å ha arbeidsplass vegg i vegg med Bergen ressurssenter for internasjonal utvikling er også veldig kjekt – der skjer det mykje bra!
– Kvifor ville du ha denne jobben?
– Å jobbe med internasjonalt forskningssamarbeid er spanande og meiningfullt. Dessutan synes eg det er kjekt å vera med å bygge opp noko nytt, som jo UiB Global på mange måtar er, sjølv om forskninga på feltet har lang historie ved UiB.
– Kva for utfordringar forventar du at jobben vil gi deg?
– Det er utfordrande å jobbe med tverrfaglege prosjekt, både med hensyn til kommunikasjon mellom ulike fagmiljø og reint administrativt i universitetssystemet. Eg vil gjere mitt beste for at UiB Global skal vera viktig og relevant for forskarane ved universitetet. Slik det er organisert i dag er UiB Global eit nytt element i UiB-strukturen, og me må jobbe aktivt for å synleggjere oss og finna vår plass.
