Ole Gunnar Evensen blir fast direktør for Universitetsbiblioteket

Etter det På Høyden kjenner til blei Evensen oppmoda til å søke stillinga, som blei ledig etter at tidlegare bibliotekdirektør Randi E. Taxt begynte i Bergen teknologioverføring AS. Stillinga har vore utlyst.

Evensen har mellom anna markert seg i debatten om gratis tilgang til vitskaplege tidsskrift, såkalla open access. Som biblioteksdirektør ser han kor store ressursar UiB må bruke på innkjøp av stadig dyrare vitskaplege tidsskrift. Kvar år går i overkant av 30 millionar kroner av UB-budsjettet til innkjøp av tidsskrift.

Men UB har ei rekkje utfordringar framfor seg, og mange er knytte til ei rask utvikling av digitale tenester og endra bruksmønster hos både studentar og vitskapleg tilsette.

– Det viktigste for Universitetsbiblioteket er å vere relevant for både forskarar og studentar. Det er mantraet vårt heile tida, seier Ole Gunnar Evensen til kommunikasjonsavdelingen ved UiB.