Opna nytt senter for havforsking

Det fulle namnet er Mohn-Sverdrup senter for globale havstudie og operasjonell oseanografi, og det er ein del av Nansensenteret. Det er kalla opp etter to føregangsmenn i norsk – og internasjonal – havforsking: Henrik Mohn og Harald Ulrik Sverdrup. Mohn var den første direktøren for Det norske meteorologiske institutt. Sverdrup var vitskapleg ansvarleg for Roald Amundsen sin ”Maud”-ekspedisjon, og vart sidan henta til California for å bli direktør for Scripps Institution of Oceanography. Senteret kjem i stand etter ei privat gåve på 25 mill. kroner frå Trond Mohn, og blir leia av professor Ola M. Johannessen.

Opninga onsdag 20. oktober hadde form av eit symposium, der det gjekk slag i slag med føredrag av forskarar frå inn- og utland. Ola M. Johannessen sjølv gav eit kort oversyn over det vitskaplege programmet for Mohn-Sverdrup senteret.

Vil forske globalt

– Vi vil drive vidareutvikling og validering av havmodellar og varslingssystem for havet, og mellom anna undersøke variabilitet og termohalin og vinddriven sirkulasjon i dei nordiske hav. Vi vil drive havvarsling for publikum, og utdanne havvarslarar i samarbeid med UiB, sa han.

Senteret skal også arbeide med å utvikle kopla fysiske og biologiske regionale havmodellar, mellom anna i Det indiske hav, der Nansensenteret allereie har drive forsking i nokre år.

Meteorologien får stadig betre system for overvaking og varsling av tilstandar i atmosfæren, men eit tilsvarande system for tilhøve i havet er enno i startfasen. I framtida ventar ein store klimaendringar i havet, med dei konsekvensane det vil få for fiskeri, olje- og gassverksemd og for livsvilkåra i kystområda. Mohn-Sverdrup senteret har difor som uttala formål å gje viktige bidrag til nasjonal og internasjonal havforsking og havvarsling.