Ingen UiB-studentar blei direkte råka av terroren som ramma Paris laurdag.
Anne Christine Johannessen, viserektor for internasjonalisering, seier at ti UiB-studentar er på utveksling i Frankrike.
– Studentane blei umiddelbart kontakta, og vi fekk vite at alle hadde det bra. Vi fekk uttrykt vår medkjensle, samt informert om at vi vil invitere dei til ei samling seinare, seier Anne Christine Johannessen.
Beredskapen følger linja
– Vi er trygge på at krisetiltaka fungerer som dei skal. Det skjer stadig ting i verda, i mindre land og i mindre målestokk enn det vi såg denne helga. Dersom UiB-studentar er i område der det skjer ei naturkatastrofe eller krigshandling, får vi straks melding om det. Universitetsdirektør Kjell Bernstrøm har hovudansvaret. Christen Soleim ved studieadministrativ avdeling tek ansvaret vidare, så dette følgjer linja. Ved studieadministrativ avdeling har dei ein beredskap klar, seier Anne Christine Johannessen.
Ho kjenner seg viss på at UiB står rusta til å ta vare på studentar i utlandet dersom det verste skulle skje.
– Vi har god oversikt over kvar norske studentar er, samt kva land utvekslingsstudentane ved UiB kjem frå, seier Anne Christine Johannessen.
Vil farge aulaen raud, blå og kvit
Franske studentar og franske tilsette ved Uni Reseach og UiB vil bli inviterte til ei samling i aulaen onsdag. Arrangementet er ikkje lukka, men franskmennene er spesielt inviterte.
Kjersti Fløttum er professor i fransk språk ved UiB. Ho er også Frankrike sin konsul i Bergen. Under arrangementet onsdag vil ho delta. Det same vil representantar frå studentane.
– Vi kjem til å ha museet opplyst i trikoloren sine fargar, seier Anne Christine Johannessen.
Ho seier at terroren i Paris rammar også UiB som universitet.
– Vi tek del i samfunnet, og vi vil ta vare på studentar og tilsette på best mogleg måte, sier Anne Christine Johannessen.
