I dag sit forskarar som har gått av med pensjon ved Det humanistiske fakultetet i Joachim Frieles gate. No skal emeritiplassane flyttast til Villaveien, og samstundes ønskjer fakultetsleiinga å sjå på om tildelinga av plassar og bruken av desse har fungert optimalt. I fakultetsstyremøtet førre veke vart difor ei sak om emeritipolitikken drøfta.
Krav om forsking
I dag har fakultetet 34 emeritiarbeidsplassar i eit felles lokale, og av dei er 21 i bruk. I tillegg har nokre emeriti arbeidsplass på eigne institutt. Dei neste åra er det fleire forskarar som går av med pensjon. Tilsette i totalt 26,6 stillingar vil gå over til å verta pensjonistar dei neste fire åra. I Villaveien er det sett av fem kontor på totalt 74 kvadratmeter til arbeidsplassar for pensjonistane.
Ei arbeidsgruppe har jobba med problemstillinga sidan i fjor haust. Deira innstilling er at det må vera eit krav at pensjonisten skal vera tilknytt ei forskargruppe eller vera aktiv med individuell instituttrelevant forsking. Publikasjonar skal registrerast i CRIStin som instituttforsking. Dersom partane er samde, kan pensjonistane som har fått tildelt arbeidsplassar delta i mellom anna rettleiing eller annan aktivitet knytt til undervisning.
Ikkje krav på plass
Arbeidsgruppa understrekar at det å få ein emeritiarbeidsplass ikkje er noko ein har krav på. I dag er det fakultetet som fordeler ut slike arbeidsplassar – i framtida bør dei fordelast mellom institutta etter prognosar om behov. Det er så institutta som avgjer kven av deira pensjonistar som skal få plass. Ein skal kunne ha ein pensjonistarbeidsplass i maksimalt fem år, med søknadsperiodar på to pluss to pluss eitt år.
I tillegg til å få arbeidsplass, meiner arbeidsgruppa at pensjonistane skal ha tilgang til infrastruktur og bibliotek, og dei skal ha rett til å delta i instituttet og fagmiljøet sine liv, men utan å vera medlem i faggrupper og utan stemmerett.
Fakultetsstyret var samde om at det er behov for nye retningslinjer. Men dei valde å senda saka ut på høyring til dei ulike institutta før endeleg vedtak vert fatta.
Fakultetsstyret ved Det humanistiske fakultet sendte saka om emeritipolitikk på høyring til institutta. Arkivfoto: Hilde Kristin Strand
