Premierte forskingsbidrag i indremedisin
Institutt for indremedisin har oppsummert forskingsåret 2003 gjennom ein posterpresentasjon på instituttet. 32 prosjekt deltok, og ein bedømmingskomité kåra tre verdige vinnerar som fekk pengepremiar for dei beste posterane.
– Posterane vart vurdert utfrå fagleg innhald, presentasjon, og tildels nyhendeverdi. Men det faglege innhaldet vog sjølvsagt tungt, fortel Peter Huszthy frå arrangementskomitéen. Huszthy var sjølv med på å lage posteren som vann førsteprisen ved presentasjonen i fjor.
Vaksine med genetisk modifiserte eggekvitestoff
Førstepremien blei motteken av Sigbjørn Berentsen som no er tilknytta sjukehuset i Haugesund. Vinnarposteren er eit resultat av meir enn ti års arbeid, opplyser Bjørn Tore Gjertsen ved Institutt for indremedisin og Medisinsk avdeling ved Haukeland universitetssykehus. Han er med i gruppa som har laga posteren.
– Det dreier seg om ein type lymfekreft som ligg i beinet. Sjukdommen er ikkje dødeleg i seg sjølv, med pasientane er sterkt plaga av låg blodprosent. Det kjem av at i låge temperaturar klumpar blodcellene seg saman med eit eggekvitestoff, og så sprekk dei. Pasientane blir invalidiserte på den måten at dei ikkje kan gå ut store delar av året - litt kald vind i andletet kan vere nok til å sende dei på sjukehus, fortel han.
Opp gjennom åra har ein prøvd mange ulike behandlingar. Den nye behandlinga går ut på å gje pasienten ei vaksine med genetisk modifiserte eggekvitestoff som angrip lymfekreftcellene. Og det har synt seg å vere effektivt.
– Nokre har blitt heilt friske, og nesten alle har opplevd ein effekt av behandlinga. No er dette i ferd med å bli ei innarbeida behandlingsform, og konseptet for studien dannar dessutan mal for andre studiar vi planlegg i framtida, seier Gjertsen.
Selolje mot leddsmerter
Andreprisen vart vunne av Gülen Arslan for eit prosjekt som tok for seg bruk av selolje i behandling av pasientar med leddsmerter og inflammatorisk tarmsjukdom. Behandlinga vart testa på ei gruppe pasientar, medan ei anna gruppe fekk placebo i form av vanleg soyaolje. Det synte seg at pasientane i den første gruppa hadde signifikant reduserte leddsmerter etter behandling med selolje.
Vinnarposteren fekk 10.000 kroner, andre- og tredjeprisen var på 5.000 kroner kvar. Prisane vart delte ut av adm.dir. i Helse Bergen, Anne Kverneland Bogsnes. Talet på deltakarar var auka mykje frå i fjor, med 32 mot 21. Posterane har vore presenterte på møte og konferansar gjennom heile 2003, og meininga er at presentasjonen og prisutdelinga skal vere ein årleg seanse på instituttet.