Superforskar flyttar til Gøteborg

Frå det svenske Vetenskapsrådet har Universitetet i Gøteborg fått  tildelt 131 millionar kroner over ti år. Institusjonen sjølv bidrar med 97 millionar kroner. Dermed har universitetet midlar til å flytte Ellen Lust og heile verksemda hennar frå Yale til Gøteborg.

Pam Fredman, rektor ved Universitetet i Gøtenborg universitet, er nøgd.
– Ellen Lust er ein svært framståande statsvitar med brei kompetanse innan det samfunnsvitskaplege området, seier Pam Fredman til nyheitsnettsida ved Gøteborgs Universitet.

Ellen Lust forskar i dag på politisk styring og deltaking i Midtausten og Nord-Afrika.

Ønske frå øverste politiske hald
Tilsettinga av Ellen Lust har god gjenklang hos den svenske regjeringa, som har bedt Vetenskapsrådet arbeide for at fleire internasjonale toppforskarar skal etablere seg i landet.

– Ho er ein forskar med brei kunnskap om den politiske utviklinga i den arabiske verda. Vi er svært glade for å kunne bidra til rekrutteringa av ein forskar som kjem til å få stor innverknad for svensk forsking på Midtausten og Nordafrika-regionen, seier Sven Stafström, generaldirektør ved Vetenskapsrådet til nyheitsnettsida ved Universitetet i Gøteborg.

Ellen Lust har vore tilsett ved Yale sidan 2000. Ho har ei omfangsrik publiseringsliste, og ho har leia tverrfaglege forskingsprosjekt i statsvitskap, sosiologi, økonomi og antropologi. Ho har også gjennomført fleire feltarbeid og opinionsundersøkingar i Egypt, Jordan, Libya, Tunisia, Marokko, Palestina og Syria.

Rekrutterina av Ellen Lust er universitetet si andre stjernerekruttering på kort tid. Tidlegare i år meldte Vetenskapsdårdet at universitetet blei tildelt 118 millionar kroner for å tilsette professor Patrik Rorsmann som har vore tilsett ved Oxford Centre for Diabetes, Endocrinology and Metabolism.