– Utvikling av ny teknologi er heilt sentralt for det grøne skiftet. Regjeringa vil satse på mogleggjerande teknologiar, og vi bruker dei gode tidene aktivt til ei slik satsing. Vi foreslår å auka løyvinga til forsking på mogleggjerande og industrielle teknologiar med 65 millionar kroner i 2019-budsjettet til Kunnskapsdepartementet. Forsking på slik teknologi kan til dømes auke produktiviteten i industrien, og redusere utsleppa av klimagassar.
Dette seier statsråd Iselin Nybø i ei pressemelding.
Totalt aukar Kunnskapsdepartementet sitt budsjett med 1,5 milliardar kroner i 2019, dersom regjeringa får det som ho vil. Teknologi er ein av vinnarane - og ei av sakene som kom ut som ein lekkasje førre veke.
Den teknologiske forskinga gjeld mellom anna forsking innanfor informasjons- og kommunikasjonsteknologi (IKT), nanoteknologi, bioteknologi og avanserte produksjonsprosessar.
Det vert òg sett av pengar til å handtera truslar i forskingsnettet. 17,5 millionar kroner skal brukast til å eteablera eit program for informasjonstryggleik.
- Samfunnet må ha tillit til handtering av personvern og datasikkerheit, og vi treng å løyse desse utfordringane i universitets- og høgskolesektoren, seier Nybø i pressemeldinga.
Midlane blir tildelte gjennom UNIT - Direktoratet for IKT og fellestenester i høgare utdanning og forsking.
Det vert sett av åtte millionar kroner til doktorgrad i offentleg sektor. Målet er særleg å få fleire lærarar til å ta doktorgrad, og det skal opprettast ti stipendiastillingar for lærarar.
Lærarar med kompetanse innanfor forsking vil bidra til å styrke samarbeidet med universitet og høgskolar, betre rettleiinga av lærarstudentar i praksis og auke kvaliteten i skolen, meiner regjeringa.
– Me vil difor motivera fleire skoleeigarar til å søke om midlar til at fleire lærerar kan ta ein offentleg sektor-ph.d., seier Nybø.
Regjeringa foreslår også å finansiere fire nye stipendiatstillingar for privat næringsliv (nærings-ph.d.). Desse forslaga følger opp den langsiktige prioriteringa «Fornying i offentleg sektor og betre offentlege tenester» og målet om «Styrka konkurransekraft og innovasjonsevne» i revidert langtidsplan for forsking og høgare utdanning.
