Unge utdanna menneske emigrerer til vestlege land med stort behov for kvalifisert arbeidskraft. – Vi subsidierer dei rike landa, seier Takyiwaa Manuh.
Manuh er professor og direktør ved Institute of African Studies ved University of Ghana og forskar mellom anna på emigrasjon og høgare utdanning i Afrika. Nyleg besøkte ho UiB og Senter for Kvinne- og kjønnsforsking.
Det er mangel på statistikk over utvandringa frå Afrika. Det gjeld også emigrasjonen av den utdanna delen av befolkningane. Men det talmaterialet som finst, talar sitt tydelege språk: Stadig fleire emigerer, ikkje minst helsepersonell. Rike land i Nord med aldrande befolkning og få barnefødslar, som Storbritannia, USA og Tyskland, driv aktiv rekruttering av ressurssterke kvinner og menn frå Afrika, særleg til helsevesenet.
– Til saman reknar vi med at det er omlag 2000 ghanesiske legar i USA, Storbritannia, Canada og Tyskland. I Ghana har vi 633. Vi subsidierer dei rike landa, seier Manuh til På Høyden.
Fleire barn døyr
Tal frå 2004 viser at vel 3000 ghanesiske sjukepleiarar flytta ut i perioden 1998 til 2003, dei fleste til Storbritannia og USA. Det er anslått at 25 prosent av ghanesarar med høgare utdanning har emigrert til ulike OECD-land, hovudsakleg USA.
Tendensen er lik i mange andre afrikanske land, og konsekvensane for kontinentet som strevar med utvikling og enorme helseproblem som aids og malaria, er svært alvorlege.
– Når den utdanna delen av befolkninga utvandrar, skaper det eit verkeleg stort problem og vil føre til at FNs tusenårsmål ikkje vil bli nådd. Ghana er eitt av 50 land i verda der barnedødelegheita i dag går opp, seier Manuh.
Bør vere opne
Også andre enn helsearbeidarar let seg friste av eit liv i den rike verda. Manuhs eigen arbeidsplass, University of Ghana, har 700 tilsette for å ta seg av 25 000 studentar. Og mange av dei tilsette er eigentleg pensjonistar, ifølgje Manuh. Universitetet i Bergen har til samanlikning nesten 3000 tilsette og 17 000 studentar.
Den ghanesiske professoren er sterkt kritisk til den strenge innvandringspolitikken som blir ført i mange europeiske land: Slusene er opne for dei høgt kvalifiserte innvandrarane, og dei blir oppmoda til å kome. Dei andre vert ulovlege innvandrarar med dei tragediene det ber med seg.
– Det er rein dobbeltmoral. Landa i Nord burde vere ærlege om dei behova dei har for innvandring. Då ville det vere mogleg å samarbeide og skape reguleringar og system til det beste for alle landa, konkluderer Manuh.