I samband med Energiforskingskonferansen 2011 offentleggjorde olje- og energiminister Terje Riis-Johansen i dag dei tre FME Samfunn-sentra som skal forske på dei samfunnsvitskaplege aspekta ved energi- og miljøutfordringane.
– Sentra si forsking skal gje politikarane kunnskapen dei treng for å legge sin energipolitiske strategi, seier divisjonsdirektør Fridtjof Unander i Noregs forskingsråd (NFR) i ei pressemelding.
Dei tre sentra er Centre for Sustainable Energy (CenSES) ved NTNU, Strategic Challenges in International Climate and Energy Policy (CICEP) ved CICERO og Oslo Center for Research on Environmentally friendly Energy (CREE) ved Frisch-senteret.
CenSES si forsking skal gje eit betre faktagrunnlag for offentlege og private avgjersletakarar i grenseflata mellom klima, energi og industri, ifølge pressemeldinga frå NFR. Forskinga er organisert i områda policyutforming og overgangsstrategiar, energisystem og marknader, økonomiske analysar, innovasjon, kommersialisering og involvering av allmennheiten og scenarioutvikling.
Ved CICEP skal internasjonal politikk og internasjonale strategiar som kan fremme ein overgang til lavkarbon-energisystem stå i høgsetet. Forskinga her vil bli organisert i fem arbeidspakkar: nasjonal politikkutvikling, studier av internasjonal klimapolitikk, verknader av internasjonal klima- og energipolitikk, europeisk klima-, energi- og teknologipolitikk og syntese og formidling.
Det tredje FME Samfunn-senteret, CREE, skal gjennom forskinga bidra til å auke kunnskapsgrunnlaget for nasjonal energipolitikk og for debatten om internasjonal energi- og klimapolitikk.
Ifølge Noregs forskingsråd utarbeida åtte forskingsmiljø skisser for å kvalifisere seg. Av desse sendte fem søknader om å bli FME Samfunn.
– Søknadene heldt høg kvalitet. Dei tre som vart valgt fekk høgast score frå vitskapspanelet og fagpanalet. Formålet med denne senterordninga er å bygge opp sterke miljø som kan bidra til eit godt kunnskapsgrunnlag for avgjersler i politikk, offentleg verksemd og bedrifter, seier Unander.