Trur genetisk rettleiing blir permanent
Nordens første studietilbod i genetisk rettleiing er no i avsluttinga av prøveperioden. Ei god ekstern evaluering gjev von om at tilbodet kan bli ei permanent ordning.
I 2001 oppretta Det medisinske fakultetet ei mellombels studieretning i genetisk rettleiing, som eitt av fleire hovudfag (no masterprogram) i helsefag. Studiet var finansiert av Helsedepartementet og skulle evaluerast etter prøveperioden. No er evalueringa gjennomført, og resultatet er så godt at Sosial- og helsedirektoratet har finansiert opptaket av eit tredje kull med masterstudentar, i påvente av at studiet skal bli eit permanent tilbod.
– Vi er ganske trygge på at vi skal få det til. Vi har allereie byrja samarbeide med universitetet i Uppsala med tanke på å få til eit studietilbod som kan dekke heile Norden, seier prosjektkoordinator Cathrine Bjorvatn.
Samarbeider om fagtilbod
Studiet blir administrert av Institutt for samfunnsmedisinske fag. Det faglege innhaldet i studiet er eit samarbeid mellom fleire fakultet ved UiB, saman med alle medisinsk-genetiske miljø i landet. Bjorvatn er svært nøgd med innsatsen både frå studentane og førelesarane.
– Vi har opplevd at folk verkeleg har hatt lyst til å medverke. Undervisinga skjer i små grupper med gjensidig kommunikasjon, slik at førelesarane også får utbyte av det, seier ho.
Genetisk rettleiing er knytt til genetisk utreiing og diagnostikk av arvelege sjukdommar. Etter kvart som bruken av gentesting aukar, veks også behovet for genetiske rettleiarar. Dette var bakgrunnen for etableringa av studiet. Å gje god genetisk rettleiing krev ikkje berre kunnskap om medisinsk genetikk, men også om kommunikasjon, etikk, pedagogikk og jus, for å nemne noko.