UiB får positiv utteljing på HF-fag
Små lærestader og NTNU får best karakter av studentane. UiB får positiv utteljing på dei to HF-faga, fransk og historie. Dette viser undersøkingar i Stud.mag, studieguiden til dei fire store fullformatavisene.
Undersøkinga er utført av NIFU (Norsk institutt for studier av forsking og utdanning) og blei nyleg offentleggjort i Bergens Tidende, Stavanger Aftenblad, Adresseavisen og Aftenposten. Undersøkinga viser dei same tendensane i år som tidlegare:
Små lærestader får betre karakterer enn store i studentane sine evalueringar. I tillegg skårer kullbaserte og yrkesfaglege utdanningsinstitusjonar høgt på fleire av skalaene. Det same gjeld NTNU.
Av dei seks universitetsfaga ved UiB som blir evaluert, kjem HF-faga fransk og historie best ut. 94 prosent er ”litt eller svært fornøgd” med fransk. For historie er tala 85 prosent. Historie er det faget ved UiB som har størst del av ”svært fornøgd” (32 prosent). Fransk og historie er dei to faga som kjem best ut ved UiB, matematikk og fysikk kjem like etter medan medisin og psykologi får mindre positiv vurdering.
Universitetet i Bergen kjem dårleg ut på studentservice. Dette ønskjer Utdanningsavdelinga å gjere noko med.
– Vi er allereie i gang med eit kompetanseprogram for studierettleiarar ved universitetet. Programmet har som mål å dekke studierettleiarane sine generelle opplæringsbehov og dei utfordringane som kvalitetsreformen og dei ulike tilfredsundersøkingane set til det administrative hjelpeapparatet, seier Lars Helge Nilsen ved Utdanningsavdelinga.
Han understrekar også at UiB har si eiga tilfredsundersøking, ”Studentbarometeret”, som i desse dagar blir gjennomført for andre gong. Det er per epost sendt ut invitasjonar til studentane om å delta på årets undersøking, som er web-basert og vil vere open i 3 veker, til og med fredag 4. april. Resultata av undersøkinga vil vere svært viktige for å få til ei betring av studentretta tenester ved UiB. Resultat og oppfølgingsarbeidet vil bli kunngjort via studentportalen.