På rangeringa til Webometrics havnar Universitetet i Oslo på ein sekstandeplass i Europa. Heilt nede på 86. plass finn vi UiB.
Københavns Universitet er best i Norden, medan Oxford-universitetet tar førsteplassen i Europa. Dette viser den siste rangeringa til Webometrics, som blei publisert i natt.
Den spanske forskingsgruppa i Webometrics er nært knytt til Spanias forskingsråd, og måler i hovudsak i kor stor grad universiteta er til stades på nettet, både med offisiell informasjon og med forskingsartiklar.
NTNU og UiB nummer 2 og 3 i Noreg
På plass 86, mellom Universitetet i Ljubljana og Trinity College Dublin, finn vi Universitetet i Bergen.
NTNU i Trondheim kjem på 30. plass i Europa. Universitetet i Tromsø hamnar som nummer 224 i Europa.
I Norden må UiB sjå seg slått av både NTNU, UiO, Københavns Universitet og Helsingfors universitet.
UiB har mange nettsider
UiB scorar høgast på «Presence», altså kor mange sider nettstaden UiB har. Her kjem UiB på ein åttande plass i Europa, og på ein 242. plass på verdsbasis. I rangeringa er denne kategorien vekta med 20 prosent. Karolinska universitet er ifølge Webometrics det mest synlege universitetet i Europa. UiO kjem på 29. plass.
Når det kjem til innhaldet på alle UiB sine nettsider, kjem UiB dårlegare ut. For å måle innhaldet tel Webometrics spesielt filformat som .pdf, .doc og andre utvalde format som ein reknar med har spesiell relevans for akademiske aktivitetar. Innhaldet kategoriserast under «Excellence», og her kjem UiB heilt nede på 104. plass.
Harvard og MiT best
Det er dei to amerikanske toppuniversiteta Harvard og Massachusetts Institute of Technology (MiT) som tar dei to øvste pallane på verdsrangeringa, tett fylgde av Stanford University på tredjeplass. Europas beste universitet, University of Oxford, kjem på 18. plass i verda. Først på 31. plass kjem det første universitetet utanfor den engelskspråklege verda. Det er Sao Paulo-universitetet i Brasil.
Foto: Ida Bergstrøm