UiBs postdoktorar har det best
Postdoktorstipendiatar innan biomedisin har det ikkje så verst i Bergen. UiB er nummer elleve i ei ny rangering av forskingsinstitusjonar utanfor USA.
Det er det amerikanske bladet The Scientist som har gjennomført ei kåring av dei beste forskingsinstitusjonane i USA og elles i verda for postdoktorstipendiatar innan biomedisin.
Einaste norske
Universitetet i Bergen får god karakter og er som einaste norske institusjon på lista over dei 15 beste utanfor USA. UiB er nummer elleve på rangeringa, som elles er dominert av skandinaviske, canadiske og hollandske universitet. Svenske Umeå Plant Science Centre kaprar førsteplassen, Uppsala Universitet er nummer to.
– Eg vil ikkje kalle denne kartlegginga for stor forsking, kommenterer prorektor ved UiB, Rune Nilsen, som stiller seg tvilande til metodgrunnlaget for rangeringa.
– Men eg trur likevel den illustrerer positive trekk ved forholda i Noreg, der Bergen står klart fram. Hos oss er både doktorgrads- og postdoktorstipendiatane ein del av dei faglege miljøa. Dei er i større grad partnarar enn i enkelte andre land, og dei har ordna avtalar og rimelege lønsvilkår. Det er dessutan høgt fagleg nivå på biomedisinmiljøa ved UiB, seier Nilsen.
Tilfredsstillande
På toppen av lista over amerikanske institusjonar ligg University of North Carolina.
Ifølgje The Scientist har rangeringane blitt til gjennom 3500 spørjeskjema som på oppfordring er levert frå i alt 769 ikkje-kommersielle forskingsinstitusjonar, 66 av dei utanfor USA. Latin-Amerika, Asia, Australia, Afrika og Aust-Europa er ikkje med i undersøkinga.
Bladet slår fast at dei femten på den ikkje-europeiske lista har tilfredsstillande økonomiske rammer og gode forhold for å skape nettverk og karrierer. Likevel uttrykker dei fleste postodoktorstipendiatane misnøye med arbeidssituasjonen, ifølgje The Scientist.