– Universitetet må ut av isolasjonen

– Universitetsmiljøa legg veldig ofte ansvaret for marginaliseringa av dei intellektuelle på media eller politikken. Det er rett, men samstundes ligg det eit stort ansvar på forskarane og dei intellektuelle sjølve. Vi må klare å omsetje utan å redusere eller kompromittere.

Det seier professor Julia Kristeva i eit intervju med Hubro, UiBs magasin, som kjem ut 14. desember.

I intervjuet argumenterer ho for at dei intellektuelle, forskarane og forfattarane har eit særskilt ansvar, i det ho karakteriserer som ”ei mørk verd”. Universiteta kan spele ei nøkkelrolle, på eitt vilkår:

Må opnast for fleire

– Dei må ut av isolasjonen.

Kristeva trur den aukande spesialiseringa i forsking og vitskap kan gjere det vanskelegare nå ut. Men det gjer ikkje ansvaret mindre.

– Dei som ikkje klarer desse omsetjingane, trur eg er menneske som har valt å verne seg gjennom skrivinga og teoriane. Dei lagar seg ei boble som dei kan overleve i, og er ikkje i stand til å opne seg for andre, seier ho til Hubro.

Det må opnast opp for fleire og leggast til rette for nye grupper med andre føresetnader og bakgrunn enn dei tradisjonelle studentane, i følgje Kristeva. Ho meiner den aukande marknadstenkinga og kommersialiseringa som i dag pregar universiteta i denne samanhengen kan vere eit gode:

– Problemet er ressursar til støtte og stipend. Vi må ha eit offentleg utdanningssystem som garanterer like vilkår for alle unge, men samstundes må vi få inn privat kapital der staten ikkje strekker til. Vi må vere pragmatiske.