Utdanningsutvalet ved UiB går inn for å ruste opp lesesalane for ein million kroner, skriv Studvest. Utvalet går inn for både å betre kvaliteten og å auke antalet lesesalsplassar, særleg på Nygårdshøyden.
Dekningsgraden for lesesalsplassar på UiB er i dag 36 %. Masterstudentane er på dei fleste fakulteta godt ivaretatt, verre er det for studentane på lågare grad. Psykologisk fakultet og HF-fakultetet har lågast dekning og lågast kvalitet på lesesalsplassane, går det fram av Utdanningsutvalet sine sakspapir til vedtaket.
Professor Kjell Haug, medlem av Utdanningsutvalet, meiner ein bør gå endå lenger når det gjeld lesesalsplassar for studentar på lågare grad. han går inn for at også studentar på lågare grad får sin eigen faste arbeidsplass på lesesalane.
– Det burde vore sjølvsagt at også studentane på lågare grad får sin eigen arbeidsplass å gå til. Studentane tilbringer mange timar på lesesalen, dei burde kunne bruke sin eigen laptop og sine eigne bøker der. Dersom dei har ein eigen arbeidsplass, trur eg også dei vert meir effektive. Eg trur ikkje me treng faste lesesalsplassar til alle studentane, det er ikkje alle som brukar lesesalen. Men dei som ønsker det bør få det, seier Haug.
Han peiker på konkurransesituasjonen for universitetet i dag, og trur fleire vil føre opp Bergen som førsteval dersom også studentane på lågare grad har gode forhold.
Det er Universitetsstyret som har siste ord i saka, vedtaket i Utdanningsutvalet er ei tilråding.
Til Studvest vil ikkje viserektor og leiar for utdanningsutvalet, Berit Rokne, garantere for at vedtaket også går gjennom i siste instans. Ho minner om at forslaget er eit av mange gode tiltak som Univeristetsstyret må vurdere.