I 2012-budsjettet vil regjeringa prioritere høgt ei etablering av eit odontologisk kompetansesenter for Vest-Noreg når det nye klinikkbygget i Bergen er klart for innflytting. Det lovar Helse-.og omsorgsdepartementet og Kunnskapsdepartementet i eit felles svar til dei to universitetsrektorane i Bergen og Oslo om framtida for spesialistutdanning for tannlegar.
– Kostbar og underfinansiert
I januar truga universitetsrektorane Sigmund Grønmo og Ole Petter Ottersen i eit felles brev med å leggje ned delar av spesialistutdanninga for tannlegar dersom ikkje regjeringa ville løyve meir pengar.
Spesialistutdanninga for tannlegar er både svært kostbar og sterkt underfinansiert, ifølge Grønmo og Ottersen. Universiteta sine eigne utrekningar viser at den vil koste 840 000 til 910 000 kroner i året per kandidat. Den auka løyvinga på 4 millionar kroner i statsbudsjettet for 2011 utgjorde på langt nær nok til å dekke kostnadene. Rektorane gav samstundes uttrykk for at ei eventuell nedlegging av spesialistutdanninga i fleire disiplinar ville gje ei kvalitetsseinking.
– Bakgrunnen for brevet var at vi ser at kostnadene er atskillig større enn det vi får finansiering for, seier Sigmund Grønmo.
Vil ha felles utrekning
Men no går departementa rektorane, i alle fall delvis, i møte. Både Kunnskapsdepartementet og Helse- og omsorgsdepartementet ønskjer i samarbeid med universiteta å kome fram til ei felles utrekning av dei samla kostnadene til spesialistutdanninga av tannlegar. Det går fram av eit svar dei to departementa no har sendt til Grønmo og Ottersen.
– Departementa tek sikte på å kome fram til omforeinte kostnader for spesialistutdanninga i samarbeid med Universitetet i Bergen og Universitetet i Oslo. Dei seier vidare at dei vil kome tilbake til spørsmålet om spesialistutdanninga i odontologi i samband med statsbudsjettet, seier Grønmo.
Dette betyr at eit nærare svar sannsynlegvis ikkje vil kome før i oktober, når regjeringa presenterer statsbudsjettet.
Grønmo understrekar at han ser fram til vidare dialog med Helse- og omsorgsdepartementet og Kunnskapsdepartementet.
